Almatyda koronavirýs juqtyrǵandardyń 92% indet anyqtalǵan sátte oqshaýlandyryldy jáne olar syrtqy ortamen bailanysta bolmaǵan. Bul týraly Almaty qalasynyń memlekettik bas sanitarlyq dárigeri Jandarbek Bekshin málim etti, dep habarlaidy QazAqparat.
Onyń aitýynsha, búginde qala boiynsha COVID-19-dyń rastalǵan 1578 jaǵdaiy tirkelgen. 8 mamyrda koronavirýs infektsiiasyn juqtyrýdyń birden 108 jaǵdaiy anyqtaldy. Olardyń barlyǵy naýqastarmen bailanysta bolýyna bailanysty karantinde jatqandar.
«92% naýqastarmen bailanysta bolǵandardyń arasynan anyqtalǵan. Sebebi, mamandar virýs juqtyrǵandarmen qarym-qatynasta bolǵandardy jedel, der kezinde baqylaýǵa alyp otyr. Naýqastardyń 7% skriningten ótken kezde, 1% meditsinalyq kómekke júginý barysynda josparly emdeýge jatqyzý aldynda anyqtalǵan. Qazirgi tańda qalamyzda profilaktikalyq skrining ádisi engizilgen. Bul – koronavirýs infektsiiasyn jedel ári sapaly, dál anyqtaityn zamanaýi ádis. Mundai ádis engizilgeli beri, mysaly, ótken sáýir aiynda koronavirýsty juqtyrý deńgeii táýligine 6% aspaǵandyqtan, qala ekonomikasyn kezeń-kezeńimen qalpyna keltirý strategiiasy júzege asyryla bastady. Karantinnen qaýipsiz shyǵý úshin Almatyda infektsiianyń jasyryn oshaqtaryn belsendi anyqtaý maqsatynda jappai testileý júrgizilýde», - dedi J.Bekshin.
Atap ótilgendei, profilaktikalyq skrining ádisiniń bergen taǵy bir nátijesi, 75% naýqastyń boiyndaǵy qaterli infektsiia simptomsyz, óte jeńil kezeńinde anyqtaldy.
«Bul, árine, syrqattyń asqynýynyń aldyn alady jáne tez saýyǵyp ketýine múmkindik mol. Ekinshiden, bul skrining bizge jasyryn indet oshaqtaryn da jedel anyqtaýǵa kómektesip jatyr.
Bir kúnde anyqtalǵan 108 naýqastyń bári karantinde otyrǵan adamdarmen bailanysta bolǵandar. Iaǵni, olar syrtqy ortadan, úiinen nemese jumys ornynan juqtyryp kelmegender. Biz ol deńgeige jetkizbedik», – dedi qalanyń bas sanitarlyq dárigeri.
Sáýir aiynda sanitarlyq-epidemiologiialyq baqylaý sharalaryn kúsheitý jáne testileý kontingentin keńeitý nátijesinde juqtyrý oshaqtary anyqtaldy. Bailanysta bolǵan barlyq adam dereý oqshaýlandy. Búgingi kúni juqtyrý jaǵdailary osy toptaǵy oqshaýlandyrylǵan adamdardyń arasyndaǵy anyqtalyp jatyr. Demek, infektsiianyń odan ári taralý joly kesildi.
Qalanyń bas sanitarlyq dárigeriniń sózinshe, PTR-diagnostikanyń aýqymy, iaǵni kontingenti keńeitilgen. Bastapqy kezeńde PTR-test júrgizetin 2 zerthana bolǵan. Al qazir olardyń sany 6-ǵa jetti. Nátijesinde ózge aimaqtarmen salystyrǵanda almatylyqtardyń PTsR-testten ótý kórsetkishi, iaǵni qamtylý deńgeii respýblika boiynsha alǵashqy orynda tur.
Almatyda osy ýaqytqa deiin jalpy 85 myńǵa jýyq adam koronavirýs infektsiiasyn anyqtaý testinen ótti, onyń ishinde 61-myńy PTR ádisimen, al 24 myńy eksperss-test boiynsha tapsyrǵan.
«PTR-diagnostika qazirgidei syn shaqta bizge eń sapaly ári jedel, dál nátije berip otyrǵanyn basa aita keteiin. Bul indet qalada eń alǵash 13 naýryzda tirkelgeni belgili. Al qazir Almaty aýrýshańdyq shyńynan ótti. Úidegi indet oshaqtarynyń sany jáne turǵyndar arasyndaǵy naýqastar kórsetkishi azaiǵan. Bul – profilaktikalyq skrining ádisiniń jemisi. Budan ári de qaýipti indetti juqtyrǵandar sanyn osylai der shaǵynda anyqtap, oqshaýlaý jáne olarmen tyǵyz bailanysta bolǵan adamdarmen jumys isteý ádisin ustanamyz. Profilaktikalyq zamanaýi bul ádis infektsiianyń syrtqy ortaǵa taralyp ketpeýiniń aldyn alady jáne virýstyń alǵashy satysynda-aq anyqtalady. Búgingi tańda osyndai jumystardyń nátijesinde naýqastar sanynyń kúndelikti ósý qarqyny 27%n 5% azaiǵan. Iaǵni, epidemiologiialyq ahýal turaqtalyp keledi. Bizdiń oiymyzsha bul kórsetkish te bara-bara odan ári tómendeidi», – dedi Jandarbek Bekshin.
