Almaty áýejaiynyń jańa halyqaralyq jolaýshylar terminalynyń tujyrymdamalyq dizainy qoǵamdyq talqylaýdan ótti, dep habarlaidy QazAqparat.
Qoǵamdyq talqylaýǵa Almaty qalasy qoǵamdyq keńes músheleri, sáýlet jáne tabiǵatty qorǵaý uiymdary, qurylys, áýe kompaniialarynyń ókilderi, kásipkerler, sonymen qatar qala turǵyndary qatysty.
2021 jyldyń mamyr aiynda Almaty áýejaiyn satyp alǵan TAV Airports kompaniiasy halyqaralyq jolaýshylar terminalynyń jańa ǵimaratyn salýdy josparlap otyr.
Jańa terminal salynǵannan keiin áýejaida jylyna 14 million jolaýshyǵa deiin qyzmet kórsetiletin bolady, iaǵni eki esege artady.
«Talqylaý barysynda qoǵam ókilderiniń túrli pikiri tyńdaldy, olardyń Almaty áýejaiynyń jańa halyqaralyq jolaýshylar terminalynyń tujyrymdamalyq dizainy týraly oilary sońǵy sheshimdi qabyldaý kezinde eskeriledi»,- dep habarlady áýejaidyń baspasóz qyzmeti.
Buǵan deiin «Almaty halyqaralyq áýejaiy» AQ prezidenti Ersoi Alp Er Týnga áýejaidyń jańa terminaly qoldanysqa 2024 jyly beriletinin aitqan bolatyn.
Aita keteiik, Memleket basshysy Qasym-Jomart Toqaev Almaty qalasyna jasaǵan jumys sapary barysynda ońtústik astana áýejaiynyń jańa halyqaralyq terminaly qurylysyna ruqsat bergen edi.
