Almaty qalasynda koronavirýs indetinen bir adam kóz jumdy, - dep habarlaidy coronavirus2020.kz.
Naýqas - 1957 jyly dúniege kelgen áiel adam.
Almaty ákimdiginiń málimeti boiynsha, 63 jastaǵy naýqas úide óz betinshe emdelgen, dáriger shaqyrmaǵan. COVID-19 aýrýyna shaldyqqany qaitys bolǵannan keiin anyqtalǵan.
"Naýqastyń kúieýiniń aitýynsha, bir apta boiy áieldiń dene qyzýy kóterilip, jótelgen. Ýchaskelik dáriger shaqyrtpaǵan. Úide óz betinshe emdelgen. Keshe (23 sáýirde) keshkisin kenetten tynysy tarylyp, esinen tanyp qalǵan" delingen ákimdik habarlamasynda.
Jedel járdem qyzmetkerleri kelgenge deiin áiel qaitys bolǵan. Analiz nátijesinde koronavirýs bary anyqtalǵan.
Qazaqstanda koronavirýstan barlyǵy 23 naýqas qaitys bolǵan.
Almaty qalasynda jeti adam virýstan qaitys bolǵan. 23 sáýirde qalada 1964 jyly týǵan áiel adam kóz jumdy. Dárigerlerdiń aitýynsha, áiel birneshe sozylmaly aýrýlarmen aýyrǵan.
Shaharda koronavirýs juqqan 764 adam anyqtalǵan. Bul - respýblika boiynsha eń joǵarǵy kórsetkish. 19 naýryzdan beri qalada karantin jariialanǵan.
