الماتى قالاسىندا كوروناۆيرۋس ٸندەتٸنەن بٸر ادام كٶز جۇمدى, - دەپ حابارلايدى coronavirus2020.kz.
ناۋقاس - 1957 جىلى دٷنيەگە كەلگەن ەيەل ادام.
الماتى ەكٸمدٸگٸنٸڭ مەلٸمەتٸ بويىنشا, 63 جاستاعى ناۋقاس ٷيدە ٶز بەتٸنشە ەمدەلگەن, دەرٸگەر شاقىرماعان. COVID-19 اۋرۋىنا شالدىققانى قايتىس بولعاننان كەيٸن انىقتالعان.
"ناۋقاستىڭ كٷيەۋٸنٸڭ ايتۋىنشا, بٸر اپتا بويى ەيەلدٸڭ دەنە قىزۋى كٶتەرٸلٸپ, جٶتەلگەن. ۋچاسكەلٸك دەرٸگەر شاقىرتپاعان. ٷيدە ٶز بەتٸنشە ەمدەلگەن. كەشە (23 سەۋٸردە) كەشكٸسٸن كەنەتتەن تىنىسى تارىلىپ, ەسٸنەن تانىپ قالعان" دەلٸنگەن ەكٸمدٸك حابارلاماسىندا.
جەدەل جەردەم قىزمەتكەرلەرٸ كەلگەنگە دەيٸن ەيەل قايتىس بولعان. اناليز نەتيجەسٸندە كوروناۆيرۋس بارى انىقتالعان.
قازاقستاندا كوروناۆيرۋستان بارلىعى 23 ناۋقاس قايتىس بولعان.
الماتى قالاسىندا جەتٸ ادام ۆيرۋستان قايتىس بولعان. 23 سەۋٸردە قالادا 1964 جىلى تۋعان ەيەل ادام كٶز جۇمدى. دەرٸگەرلەردٸڭ ايتۋىنشا, ەيەل بٸرنەشە سوزىلمالى اۋرۋلارمەن اۋىرعان.
شاھاردا كوروناۆيرۋس جۇققان 764 ادام انىقتالعان. بۇل - رەسپۋبليكا بويىنشا ەڭ جوعارعى كٶرسەتكٸش. 19 ناۋرىزدان بەرٸ قالادا كارانتين جارييالانعان.
