Energetika ministrligi Qazaqstannyń birneshe aimaǵynda jaryqtyń bolmaýyna qatysty túsinikteme berdi, dep habarlaidy "Ult aqparat" vedomstvonyń baspasóz qyzmetine silteme jasap.
«2022 jylǵy 25 qańtarda saǵat 11:59-da (Nur-Sultan ýaqyty boiynsha) Ortalyq Aziianyń energiia júiesindegi eleýli avariialyq teńgerimsizdikke bailanysty «Qazaqstannyń Soltústik-Shyǵys-Ońtústik» 500 kV elektr energiiasynyń tranzitine qýat túsirildi.
Nátijesinde, Qazaqstannyń ońtústik aimaǵy tutynýshylarynyń edáýir bóligin ajyratý arqyly «Qazaqstannyń Soltústik-Shyǵys-Ońtústik» tranzitiniń avariialyq bólinýi oryn aldy. Shekteýler kólemi 1500 megavattan asty, onyń ishinde, Almaty qalasy men Almaty oblysynda – 1000 MVt, Jambyl oblysynda – 300 MVt, Túrkistan oblysynda – 500 MVt jáne Qyzylorda oblysynda - 200 MVt.
Jiiliktiń otyryp qalýy saldarynan (47 Gts-ten tómen) Ózbekstan, Qyrǵyzstan energiia júieleri tolyq óshirildi. Avtomatika jumysymen Jambyl GRES, Shymkent JEO-3, Qyzylorda JEO-6 jáne Almaty oblysynyń elektr stantsiialarynyń tolyq óshirilýine jol berilmedi, atalǵan oblystardyń tutynýshylary shamamen 500 MVt elektrmen jabdyqtaldy. Avtomatikanyń áreketimen Almaty energiia toraby shamamen 700 MVt elektr tutynýdy saqtai otyryp, oqshaýlanǵan jumysqa bólingen.
Saǵat 13:39-da ulttyq elektr jelisiniń Almaty energiia torabymen qalypty shemasy tolyq qalpyna keltirildi. Almaty jáne Almaty oblysynyń óńirlik elektr jelilik kompaniialary shekteýlerdi alyp tastaýdy júzege asyrdy.
Ońtústik oblystardy elektrmen jabdyqtaýdy qalpyna keltirý jumystary jalǵasýda» delingen habarlamada.
