Almatyda dárigerler er adamnyń kózinen 3 sm sym temir alyp shyqty, dep habarlaidy "Ult aqparat".
Qalalyq klinikalyq ortalyq aýrýhananyń baspasóz qyzmetinen habarlaǵandai, er adam jumysynda jaraqat alǵan.
Sym temir kóz almasyna kirip ketken.
Oftalmohirýrg, meditsina ǵylymdarynyń magistri Medet Altynbek shuǵyl túrde ota jasady. 1 saǵatqa sozylǵan otadan soń 3 sm spiral alyndy.
Ota nátijesinde kóziniń aldyńǵy kamerasy men nurly qabyǵy qalpyna keltirildi. Kesilgen jara orny tigilip, kózdiń kórý qabileti qalpyna keldi.
«Osyndai jaǵdaida der kezinde kómek kórsetilmese, kózge keń kólemde qan jaiylýy múmkin. Adam kórý qabiletinen aiyrylady. Ota sátti ótti. Patsient bólimshege aýystyryldy»,- dedi dáriger.
Aita keteiik, qalalyq Ortalyq klinikalyq aýrýhananyń oftalmologiialyq bólimshesinde jyl basynan beri 130 joǵary tehnologiialyq ota jasaldy.
