QR Ishki ister ministri Erlan Turǵymbaev Almaty blokpostynda qaza tapqan politsiia qyzmetkerleriniń otbasyna qandai kómek kórsetiletinin aitty, dep habarlaidy "Ult aqparat".
«Qyzmettik mindetin óteý barysynda qaza tapqan politsiia qyzmetkerlerine memleket tarapynan jerleý shyǵyndary óteledi. Ol 400-den 500 myń teńgege deiingi mólsherde bolady. Sonymen qatar qaza tabýyna bailanysty birretik ótemaqy beriledi. Janǵazievke shamamen 10 mln, Ábdiqanovqa 7,5 mln teńge beriledi. Bizdiń qyzmetkerlerimizdiń barlyǵy saqtandyrylǵan. Sondyqtan áleýmettik qorǵaý organdary tarapynan Memlekettik áleýmettik saqtandyrý qorynan asyraýshysynan aiyrylýyna bailanysty onyń balalaryn asyraýǵa tólem qarastyrylǵan», - dedi Erlan Turǵymbaev Ortalyq kommýnikatsiialar qyzmetinde ótken brifingide BAQ ókilderiniń saýalyna orai.
Ministr búkil elimizdi dúr silkintken osy oqiǵaǵa bailanysty Almatyǵa baryp, qaza tapqan eki qyzmetkerdiń otbasylaryna kóńil aitqanyn atap ótti.
«Óitkeni olar bizdiń úzdik qyzmetkerlerimiz edi. Qyzmettik mindetterin oryndaý barysynda qaza tapty. Olar 78 táýlik boiy kúni-túni atalǵan blokpostarda, is júzinde otbasynan shalǵaida júrdi. Sonymen qatar qyzmettik paryzdaryn sońyna deiin atqardy. Olar Memleket basshysynyń Jarlyǵymen memlekettik nagradalarmen marapattaldy. Sonymen qatar qazirgi ýaqytta Almaty ákimdigi tarapynan olardyń otbasyna baspana bólý máselesi qarastyrylyp jatyr. Janǵazievtiń artynda áieli men eki balasy qaldy. Jubaiy dáriger, ol da osy kúnderi aýrýhanada jumys istedi. Taiaýda shańyraq kótergen Ábdiqanovtyń balasynyń dúniege kelgenine bir ǵana ai boldy. Ol da jas otbasy, ata-anasymen birge turyp kelgen. Ekeýiniń de jekemenshik baspanalary bolmaǵan. Sondyqtan ákimdikke ótinish jasadym. Qala ákimi sheshim qabyldady. Taiaý ýaqytta baspana máselesi sheshiledi dep oilaimyn», - dedi Erlan Turǵymbaev.
Sonymen qatar ministr osy oqiǵa kezinde jaraqat alyp, birneshe kún boiy aýrýhananyń jansaqtaý bóliminde jatqan úshinshi qyzmetkerdiń ómiri úshin arpalysyp júrgen dárigerlerge rizashylyǵyn bildirdi.
«Ony jansaqtaý bóliminen jalpy palataǵa aýystyrdy. Densaýlyǵyna esh qaýip tónip turǵan joq», - dedi ol.
