Áýejai qyzmetkerleriniń aitýynsha, ǵimaratqa shabýyl 5 qańtarda keshki saǵat segizder shamasynda bastalǵan. Qarýly topty alǵashqylardyń biri bolyp Keńes Nurambekov baiqaǵan. Sol kúni ol reidke birneshe saǵat qalǵanda aýysymyn qabyldaǵan eken. Radio arqyly er adam jaǵdaidy dereý qaýipsizdik qyzmetine habarlaǵan.
"Olardyń qolynda alystan qaraǵanda taiaqtar nemese temir, sonymen qatar politsiia qalqandary boldy. Al bastarynda arnaiy jasaq kaskalary boldy, ony sózsiz anyq kórdim. Olar sonda 10-15 minýttai jinaldy. Olarmen bailanys ornatý múmkin emes edi", - dep eske alady Almaty halyqaralyq áýejaiy terminalynyń aýysym bastyǵy Keńes Nurambekov.
Shabýyl kezinde birneshe ushaq ushýǵa daiyndalyp jatqan, onyń ishinde 200-den astam adam bolǵan. Lainerlerdi birden qaýipsiz jerge súirep aparǵan. Al dispetcherler Almaty áýejaiyna qonýǵa kele jatqan barlyq reisti keri qaitara bastaǵan.
"Ushqyshtar birden balama aerodromǵa qoný týraly sheshim qabyldady. Áli qonbaǵandary. Meniń qasymda áriptesterim boldy, biraq jumysqa qaita oralǵanda jalǵyz qaldym. Keiin meni qorǵaý úshin avtomattary bar eki politsiia qyzmetkerin taǵaiyndady. Sonda qorqynysh seiildi", - dedi "Almaty halyqaralyq áýejaiy" AQ jedel basqarý ortalyǵynyń dispetcheri Aida Qasymbaeva.
Osy ýaqytta terminalda naǵyz dúrbeleń bastalǵan. Jolaýshylar júkterin tastap, shyǵýǵa qarai júgirgen. Sharasyz adamdar tike ushyp-qoný jolaǵyna qarai shyǵyp ketken. Onda olardy áýejai qyzmetkerleri jinap alyp, avtobýspen bos angarlarǵa apardy.
"Terminalda bolǵandardy evakýatsiialadyq, shamamen 800-900 adam boldy. Qolymyzda bar kólikter, barlyǵy jumyldyryldy. Tipti shaǵyn júk tasyǵyshtarmen de evakýatsiialadyq. Jastar bizge qarai júgirdi - men mundai kózderdi birinshi ret kórdim. Olar qandy, kózderi qyzarǵan. Shynymdy aitsam, azdap qorqynyshty boldy", - dep moiyndady "Almaty halyqaralyq áýejaiy" AQ aýysym bastyǵy Farhat Sábitov.
10 saǵatqa jýyq jolaýshylar men áýejai qyzmetkerleri qaraqshylardan jasyrynǵan. Tek tańerteń olardyń sońynan áskeriler kelip, jaǵdaidy baqylaýǵa alyp, terminaldy lańkesterden bosatqan. Qaqtyǵys saldarynan jolaýshylar men qyzmetkerlerdiń eshqaisysy zardap shekken joq.
Negizgi soqqy terminalǵa túsken. Biraq shabýyl kezinde qymbat jabdyqtar men aeronavigatsiialyq júieler zaqymdanbaǵan. Sondai-aq áýejai qyzmetkerleri birde-bir áýe laineriniń urlanbaǵanyn nemese zaqymdanbaǵanyn aitty.
