ەۋەجاي قىزمەتكەرلەرٸنٸڭ ايتۋىنشا, عيماراتقا شابۋىل 5 قاڭتاردا كەشكٸ ساعات سەگٸزدەر شاماسىندا باستالعان. قارۋلى توپتى العاشقىلاردىڭ بٸرٸ بولىپ كەڭەس نۇرامبەكوۆ بايقاعان. سول كٷنٸ ول رەيدكە بٸرنەشە ساعات قالعاندا اۋىسىمىن قابىلداعان ەكەن. راديو ارقىلى ەر ادام جاعدايدى دەرەۋ قاۋٸپسٸزدٸك قىزمەتٸنە حابارلاعان.
"ولاردىڭ قولىندا الىستان قاراعاندا تاياقتار نەمەسە تەمٸر, سونىمەن قاتار پوليتسييا قالقاندارى بولدى. ال باستارىندا ارنايى جاساق كاسكالارى بولدى, ونى سٶزسٸز انىق كٶردٸم. ولار سوندا 10-15 مينۋتتاي جينالدى. ولارمەن بايلانىس ورناتۋ مٷمكٸن ەمەس ەدٸ", - دەپ ەسكە الادى الماتى حالىقارالىق ەۋەجايى تەرمينالىنىڭ اۋىسىم باستىعى كەڭەس نۇرامبەكوۆ.
شابۋىل كەزٸندە بٸرنەشە ۇشاق ۇشۋعا دايىندالىپ جاتقان, ونىڭ ٸشٸندە 200-دەن استام ادام بولعان. لاينەرلەردٸ بٸردەن قاۋٸپسٸز جەرگە سٷيرەپ اپارعان. ال ديسپەتچەرلەر الماتى ەۋەجايىنا قونۋعا كەلە جاتقان بارلىق رەيستٸ كەرٸ قايتارا باستاعان.
"ۇشقىشتار بٸردەن بالاما اەرودرومعا قونۋ تۋرالى شەشٸم قابىلدادى. ەلٸ قونباعاندارى. مەنٸڭ قاسىمدا ەرٸپتەستەرٸم بولدى, بٸراق جۇمىسقا قايتا ورالعاندا جالعىز قالدىم. كەيٸن مەنٸ قورعاۋ ٷشٸن اۆتوماتتارى بار ەكٸ پوليتسييا قىزمەتكەرٸن تاعايىندادى. سوندا قورقىنىش سەيٸلدٸ", - دەدٸ "الماتى حالىقارالىق ەۋەجايى" اق جەدەل باسقارۋ ورتالىعىنىڭ ديسپەتچەرٸ ايدا قاسىمباەۆا.
وسى ۋاقىتتا تەرمينالدا ناعىز دٷربەلەڭ باستالعان. جولاۋشىلار جٷكتەرٸن تاستاپ, شىعۋعا قاراي جٷگٸرگەن. شاراسىز ادامدار تٸكە ۇشىپ-قونۋ جولاعىنا قاراي شىعىپ كەتكەن. وندا ولاردى ەۋەجاي قىزمەتكەرلەرٸ جيناپ الىپ, اۆتوبۋسپەن بوس انگارلارعا اپاردى.
"تەرمينالدا بولعانداردى ەۆاكۋاتسييالادىق, شامامەن 800-900 ادام بولدى. قولىمىزدا بار كٶلٸكتەر, بارلىعى جۇمىلدىرىلدى. تٸپتٸ شاعىن جٷك تاسىعىشتارمەن دە ەۆاكۋاتسييالادىق. جاستار بٸزگە قاراي جٷگٸردٸ - مەن مۇنداي كٶزدەردٸ بٸرٸنشٸ رەت كٶردٸم. ولار قاندى, كٶزدەرٸ قىزارعان. شىنىمدى ايتسام, ازداپ قورقىنىشتى بولدى", - دەپ مويىندادى "الماتى حالىقارالىق ەۋەجايى" اق اۋىسىم باستىعى فارحات سەبيتوۆ.
10 ساعاتقا جۋىق جولاۋشىلار مەن ەۋەجاي قىزمەتكەرلەرٸ قاراقشىلاردان جاسىرىنعان. تەك تاڭەرتەڭ ولاردىڭ سوڭىنان ەسكەريلەر كەلٸپ, جاعدايدى باقىلاۋعا الىپ, تەرمينالدى لاڭكەستەردەن بوساتقان. قاقتىعىس سالدارىنان جولاۋشىلار مەن قىزمەتكەرلەردٸڭ ەشقايسىسى زارداپ شەككەن جوق.
نەگٸزگٸ سوققى تەرمينالعا تٷسكەن. بٸراق شابۋىل كەزٸندە قىمبات جابدىقتار مەن اەروناۆيگاتسييالىق جٷيەلەر زاقىمدانباعان. سونداي-اق ەۋەجاي قىزمەتكەرلەرٸ بٸردە-بٸر ەۋە لاينەرٸنٸڭ ۇرلانباعانىن نەمەسە زاقىمدانباعانىن ايتتى.
