Almaty ákiminiń orynbasary Erjan Babaqumarov bastaǵan jumys toby qonaq úi men jataqhanada turyp jatqan meditsina qyzmetkerleriniń jaǵdaiyn tekserdi, dep habarlaidy "Ult aqparat".
Jumys tobynyń quramynda Nur Otan partiiasy Almaty qalalyq filialy tóraǵasynyń birinshi orynbasary Stansilav Kankýrov, qalalyq qoǵamdyq densaýlyq saqtaý basqarmasy basshysynyń orynbasary Ásel Bisenbaeva men Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Natalia Diagileva, Sybailas jemqorlyqqa qarsy is-qimyl agenttigi janyndaǵy arnaiy monitoringtik top tóraǵasynyń orynbasary, «Jastarǵa jol» qoǵamdyq qorynyń prezidenti Rafael Gasanov bar.
Tótenshe jaǵdai kezinde 3,5 myńǵa jýyq meditsina qyzmetkeri óz qalaýy boiynsha jergilikti biýdjettiń qarjylandyrý esebinen 13 qonaq úi kesheni men 11 jataqhanaǵa ornalasqan bolatyn.
Jumys toby 503 meditsinalyq qyzmetker turyp jatqan 5 qonaq úi kesheni men 2 jataqhanaǵa bardy. Munda Jedel járdem, Balalar juqpaly aýrýlar men qalalyq juqpaly aýrýlar aýrýhanalarynyń, Psihikalyq densaýlyq ortalyǵy men №2 perzenthananyń, №5 qalalyq klinikalyq aýrýhananyń qyzmetkerleri turyp jatyr.
Tekserý barysynda turǵylyqty jerdiń jaǵdaiy, qyzmetkerlerdiń bólmeleri, ondaǵy sanitarlyq-epidemiologiialyq qaýipsizdik normalarynyń saqtalýy, ásirese bólmelerdegi dezinfektsiia jumystarynyń der kezinde júrgizilýine erekshe kóńil bólindi. Sondai-aq jeke qorǵaný men jeke gigiena quraldarynyń jetkilikti deńgeide ekendigine kóz jetkizildi.
«Eń bastysy – turmys jaǵdaiy. Dárigerler men meditsina qyzmetkerleri aldyńǵy shepte, iaǵni qaýip-qater aimaǵynda jumys isteidi. Olarǵa yńǵaily bolýy úshin turmysta da, jumysta da durys júie qalyptasty. Barlyq qaýipsizdik sharalaryn saqtaý mańyzdy», – dedi E. Babaqumarov.
Qala basshysynyń orynbasary Erjan Babaqumarov medqyzmetkerlerdi sapaly azyq-túlikpen qamtamasyz etý máselesine de toqtaldy. Azyq-túliktiń jetkizilýi men onyń sapasyn eriktilerdiń qalalyq shtaby baqylaidy.
Meditsina qyzmetkerlerin jumys ornyna deiin jetkizip, qaita úiine aparý máselesi de pysyqtaldy.
Sheneýnik qonaq úiler men jataqhanalarda ýaqytsha turyp jatqan medqyzmetkerlermen tildesti. Tamaqtaný, jumysqa tasymaldaý boiynsha kórsetiletin qyzmetterdiń sapasy, sonymen qatar jumys oryndaryndaǵy eńbek jaǵdailary da talqylandy.
«Qazir elimiz qiyn-qystaý kezeńdi bastan keshirýde. Biz, meditsina qyzmetkerleri, qolymyzdan kelgenshe aianbai jumys isteýdemiz. Almaty ákimdigine berilgen múmkindikter úshin alǵys bildiremiz. Qajet zattardyń barlyǵy bar, bólmeler taza, tamaqtary da jaqsy. Qazirgi ýaqytta dáriger retinde zor jaýapkershilikti sezinemiz. Birlese bul dertti jeńetinimizge senemin», - dedi balalar juqpaly aýrýlar aýrýhanasynyń rentgenolog-laboranty S. Erkinbekov.
Tekserý jumystary kezinde Taýarlar men qyzmetterdiń sapasy men qaýipsizdigin baqylaý departamentiniń ókili barlyq sanitarlyq-epidemiologiialyq normalardyń saqtalǵanyn atap ótti.
