الماتى ەكٸمٸنٸڭ ورىنباسارى ەرجان باباقۇماروۆ باستاعان جۇمىس توبى قوناق ٷي مەن جاتاقحانادا تۇرىپ جاتقان مەديتسينا قىزمەتكەرلەرٸنٸڭ جاعدايىن تەكسەردٸ, دەپ حابارلايدى "ۇلت اقپارات".
جۇمىس توبىنىڭ قۇرامىندا Nur Otan پارتيياسى الماتى قالالىق فيليالى تٶراعاسىنىڭ بٸرٸنشٸ ورىنباسارى ستانسيلاۆ كانكۋروۆ, قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ەسەل بيسەنباەۆا مەن تاۋارلار مەن كٶرسەتٸلەتٸن قىزمەتتەردٸڭ ساپاسى مەن قاۋٸپسٸزدٸگٸن باقىلاۋ دەپارتامەنتٸ باسشىسىنىڭ ورىنباسارى ناتاليا دياگيلەۆا, سىبايلاس جەمقورلىققا قارسى ٸس-قيمىل اگەنتتٸگٸ جانىنداعى ارنايى مونيتورينگتٸك توپ تٶراعاسىنىڭ ورىنباسارى, «جاستارعا جول» قوعامدىق قورىنىڭ پرەزيدەنتٸ رافاەل گاسانوۆ بار.
تٶتەنشە جاعداي كەزٸندە 3,5 مىڭعا جۋىق مەديتسينا قىزمەتكەرٸ ٶز قالاۋى بويىنشا جەرگٸلٸكتٸ بيۋدجەتتٸڭ قارجىلاندىرۋ ەسەبٸنەن 13 قوناق ٷي كەشەنٸ مەن 11 جاتاقحاناعا ورنالاسقان بولاتىن.
جۇمىس توبى 503 مەديتسينالىق قىزمەتكەر تۇرىپ جاتقان 5 قوناق ٷي كەشەنٸ مەن 2 جاتاقحاناعا باردى. مۇندا جەدەل جەردەم, بالالار جۇقپالى اۋرۋلار مەن قالالىق جۇقپالى اۋرۋلار اۋرۋحانالارىنىڭ, پسيحيكالىق دەنساۋلىق ورتالىعى مەن №2 پەرزەنتحانانىڭ, №5 قالالىق كلينيكالىق اۋرۋحانانىڭ قىزمەتكەرلەرٸ تۇرىپ جاتىر.
تەكسەرۋ بارىسىندا تۇرعىلىقتى جەردٸڭ جاعدايى, قىزمەتكەرلەردٸڭ بٶلمەلەرٸ, ونداعى سانيتارلىق-ەپيدەميولوگييالىق قاۋٸپسٸزدٸك نورمالارىنىڭ ساقتالۋى, ەسٸرەسە بٶلمەلەردەگٸ دەزينفەكتسييا جۇمىستارىنىڭ دەر كەزٸندە جٷرگٸزٸلۋٸنە ەرەكشە كٶڭٸل بٶلٸندٸ. سونداي-اق جەكە قورعانۋ مەن جەكە گيگيەنا قۇرالدارىنىڭ جەتكٸلٸكتٸ دەڭگەيدە ەكەندٸگٸنە كٶز جەتكٸزٸلدٸ.
«ەڭ باستىسى – تۇرمىس جاعدايى. دەرٸگەرلەر مەن مەديتسينا قىزمەتكەرلەرٸ الدىڭعى شەپتە, ياعني قاۋٸپ-قاتەر ايماعىندا جۇمىس ٸستەيدٸ. ولارعا ىڭعايلى بولۋى ٷشٸن تۇرمىستا دا, جۇمىستا دا دۇرىس جٷيە قالىپتاستى. بارلىق قاۋٸپسٸزدٸك شارالارىن ساقتاۋ ماڭىزدى», – دەدٸ ە. باباقۇماروۆ.
قالا باسشىسىنىڭ ورىنباسارى ەرجان باباقۇماروۆ مەدقىزمەتكەرلەردٸ ساپالى ازىق-تٷلٸكپەن قامتاماسىز ەتۋ مەسەلەسٸنە دە توقتالدى. ازىق-تٷلٸكتٸڭ جەتكٸزٸلۋٸ مەن ونىڭ ساپاسىن ەرٸكتٸلەردٸڭ قالالىق شتابى باقىلايدى.
مەديتسينا قىزمەتكەرلەرٸن جۇمىس ورنىنا دەيٸن جەتكٸزٸپ, قايتا ٷيٸنە اپارۋ مەسەلەسٸ دە پىسىقتالدى.
شەنەۋنٸك قوناق ٷيلەر مەن جاتاقحانالاردا ۋاقىتشا تۇرىپ جاتقان مەدقىزمەتكەرلەرمەن تٸلدەستٸ. تاماقتانۋ, جۇمىسقا تاسىمالداۋ بويىنشا كٶرسەتٸلەتٸن قىزمەتتەردٸڭ ساپاسى, سونىمەن قاتار جۇمىس ورىندارىنداعى ەڭبەك جاعدايلارى دا تالقىلاندى.
«قازٸر ەلٸمٸز قيىن-قىستاۋ كەزەڭدٸ باستان كەشٸرۋدە. بٸز, مەديتسينا قىزمەتكەرلەرٸ, قولىمىزدان كەلگەنشە ايانباي جۇمىس ٸستەۋدەمٸز. الماتى ەكٸمدٸگٸنە بەرٸلگەن مٷمكٸندٸكتەر ٷشٸن العىس بٸلدٸرەمٸز. قاجەت زاتتاردىڭ بارلىعى بار, بٶلمەلەر تازا, تاماقتارى دا جاقسى. قازٸرگٸ ۋاقىتتا دەرٸگەر رەتٸندە زور جاۋاپكەرشٸلٸكتٸ سەزٸنەمٸز. بٸرلەسە بۇل دەرتتٸ جەڭەتٸنٸمٸزگە سەنەمٸن», - دەدٸ بالالار جۇقپالى اۋرۋلار اۋرۋحاناسىنىڭ رەنتگەنولوگ-لابورانتى س. ەركٸنبەكوۆ.
تەكسەرۋ جۇمىستارى كەزٸندە تاۋارلار مەن قىزمەتتەردٸڭ ساپاسى مەن قاۋٸپسٸزدٸگٸن باقىلاۋ دەپارتامەنتٸنٸڭ ٶكٸلٸ بارلىق سانيتارلىق-ەپيدەميولوگييالىق نورمالاردىڭ ساقتالعانىن اتاپ ٶتتٸ.
