Almaty ákimi Baqytjan Saǵyntaev Memleket basshysy Qasym-Jomart Toqaevtan «Samuryq-Qazyna» Ulttyq ál-aýqat qoryna JEO-2-niń gazǵa ótýin jyldamdatýdy tapsyrýyn surady, dep habarlaidy QazAqparat.
Ákim ekologiia máselesi barlyq qala turǵyndaryn alańdatyp otyrǵanyn atap ótti. Qaýipti faktorlardyń biri – ziiandy zattardyń shyǵarylýy.
«2018 jyly qorshaǵan ortaǵa shyǵarylǵan ziiandy zattardyń jalpy kólemi 123 myń tonnany qurady, onyń ishinde JEO-2 úlesi 27% boldy. Qazirgi ýaqytta «Samuryq-Energo» AQ qoldanystaǵy stansyny gazǵa aýystyrýdy kózdeitin tehnikalyq-ekonomikalyq negizdeme ázirleýde. Jobany iske asyrý arqyly atmosferadaǵy ziiandy shyǵaryndylardyń úlesin 17 ese azaitýǵa múmkindik bar. Osy jobanyń áleýmettik mańyzyn eskere otyryp, «Samuryq-Qazynaǵa» sáikes qujattamalar ázirlenip bolǵan soń barlyq protsedýralardy tezdetýdi tapsyrýyńyzdy suraimyn», - dedi Almaty ákimi Baqytjan Saǵyntaev Memleket basshysynyń qatysýymen ótip jatqan Almatyny áleýmettik-ekonomikalyq damytýǵa arnalǵan otyrysta.
