Qaita qalpyna keltirilip jatqan ákimdik ǵimaratynyń birinshi qabaty halyqty qabyldaýǵa yńǵaily bolýy kerek. Bul týraly Almaty ákimi Baqytjan Saǵyntaev qalanyń tynys-tirshiligin qalpyna keltirý jónindegi qalalyq shtab otyrysynda aitty, dep habarlaidy QazAqparat.
Almaty ákimniń orynbasary Muhit Ázirbaevtyń aitýynsha, ákimdik ǵimaratynyń tarihi kelbeti qaita qalpyna keltiriledi.
«QazǴZJI mamandarynyń aitýynsha, ákimdik ǵimaratynyń syrtqy qabaty órtten qatty zaqymdalǵan. Sol sebepti ǵimarattyń qasbetindegi mármár tastaryn buzýǵa májbúr boldyq. Bizdiń maqsatymyz ǵimaratty tarihi kelbetine qaitarý. Tas jáne basqa materialdardy jobany buryn syzǵan avtorlarmen jáne qaladaǵy sáýletshilermen birge tańdap, qalpyna keltiremiz» - dedi ákimniń orynbasary Muhit Ázirbaev.
Baqytjan Saǵyntaev qala ákimdiginiń birinshi qabatyn halyqty qabyldaýǵa yńǵaily etip jasaý kerektigin aitty.
«Ákimdik ǵimaratynyń birinshi qabaty halyqpen ashyq kezdesýge yńǵaily emes. Múmkin osy jaǵdaidy paidalana otyryp, Áleýmettik úidi jasaǵandai turǵyndarmen kezdesýge yńǵaily etip jasaǵan durys shyǵar. Osy jaǵyn sáýletshilermen aqyldasyp kórińizder. Bul jurtshylyqpen kezdesýge, olarǵa qyzmet kórsetýge yńǵaily bolar edi», - dedi Baqytjan Saǵyntaev.
