Almaty ákimi Baqytjan Saǵyntaev Instagram-daǵy paraqshasynda dári tapshylyǵy problemasyn sheshý úshin farmkompaniialar men salalyq qaýymdastyq basshylarymen birneshe kezdesýler ótkizgenin málim etti, dep habarlaidy QazAqparat.
«Mamandardyń pikirinshe, dári-dármek tapshylyǵy áldebireýler usynǵan dárilermen emdelýdi jón kórgen turǵyndardyń dúrligýinen paida bolǵan. Termometrlerdiń de tapshylyǵy oryn aldy. Bir aiǵa jetýi tiis 30 myń gradýsnik eki kúnniń ishinde satylyp, bitip qaldy. Baǵa da birden sharyqtaǵan», — dep jazdy qala ákimi.
Sonymen qatar, ol QR farmatsevtikalyq qyzmetti qoldaý jáne damytý qaýymdastyǵy, megapolistiń dárihanalar jelisi, dári jetkizýshiler jáne medikamentterdi óndirýshilerimen memorandýmǵa qol qoiylǵanyn jetikizdi. Osylaisha, qala dárihanalaryna áleýmettik mańyzy bar dárilerdiń 41 ataýynyń jedel túrde jetkizilýi qamtamasyz etiletin bolady.
Memorandýmǵa Almaty qalasynyń Kásipkerlik jáne investitsiialar basqarmasy, Taýarlar men qyzmetterdiń sapasy men qaýipsizdigin baqylaý departamenti, QR farmatsevtikalyq qyzmetti qoldaý jáne damytý qaýymdastyǵy, sonymen birge, megapolistiń dárihanalar jelisi, dári jetkizýshiler jáne medikamentterdi óndirýshileri qol qoidy.
Memorandýmǵa sáikes, dárihanalar Densaýlyq saqtaý ministriniń 2019 jyldyń 15 shildedegi buiryǵynda belgilengen baǵalardy ustanýlary kerek. Sonymen birge tapsyrysty jetkizýshiler, óndirýshiler jáne qala dárihanalary júieli túrde dárige degen tapshylyqty retteý maqsatynda Almaty qalasynyń ákimdigine dárilerdiń bar-joqtyǵy, olardyń bir kúndegi satylymy, sonymen birge jaqyn arada jetkizilýi tiis dáriler týraly aqparat berip otyrýlary kerek.
Búgingi tańda memorandým aiasynda qala boiynsha 102 iri dárihananyń bary anyqtaldy, olarǵa áleýmettik mańyzdy dárilerdiń 41 ataýy jetkiziledi. Mundai dárihanalar qalanyń árbir aýdanynda bar. Árbir 41 preparat boiynsha negizsiz dúrlikpeni boldyrmaý maqsatynda bir qolǵa satýǵa ruqsat etilgen mólsheri anyqtaldy. Jalpy, qalany qajetti dárilermen jáne termometriiamen qamtamasyz etý máselesi sheshimin tapty.
Dárilik quraldardy jetkizýshi iri kompaniialar «Paratsetamol», «Ibýprofen», «Efferalgan», «Aspirin», «Tamifliý», «Ingavirin», «Azitromitsin» jáne «Sýmamed» dárileriniń kúndelikti jetkizilýin júzege asyrady. Qalada qazir «Paratsetamoldyń» 240 000 danasy, «Ibýprofenniń» 187 000 danasy, «Efferalgannyń» 11 000 danasy, «Aspirinniń» 206 000, «Tamifliýdiń» 40 000, «Azitromitsinniń» 160 000 danasy jáne «Sýmamedtiń» 10 000 danasy bar. Jaqyn kúnderi atalǵan medikamentterdiń úlken kólemdegi qosymsha jetkizilimi kútilýde.
Sonymen birge, 29 maýsymnan bastap termometrlerdiń alǵashqy iri jetkizilimderi bastaldy – iri dárihana jelilerine 30 000 danasy tielip, jóneltildi. Aldaǵy kúnderi qosymsha 780 000 dana termometr keledi dep kútilýde.
