Almaty ákimdigi asa qajettilik bolmasa, adam kóp jinalatyn jerlerge barmaýdy eskertti. Bul týraly Almaty qalasy ákimdiginiń baspasóz ortalyǵy alańyndaǵy brifing barysynda Almaty qalasy Qoǵamdyq densaýlyq basqarmasynyń basshysy Tileýhan Ábildaev aitty, dep habarlaidy "Ult aqparat".
«Búginde Almaty qalasy aýmaǵynda koronavirýstyq infektsiianyń rastalǵan jaǵdailary joq. Qalaǵa qaýipti aimaqtardan keletin adamdarǵa oqshaýlaý sharalary qoldanyldy», — dedi T. Ábildaev.
Sonymen qatar, barlyq meditsinalyq uiymdardyń jeke qorǵaný quraldarymen tolyq qamtamasyz etilgeni aityldy.
Shet elden kelgender meditsinalyq uiymdardyń kómegine júginetin bolsa, olarǵa jete kóńil bólinetin bolady jáne úi karantini belgilenedi.
Aita ketý kerek, bul másele Almaty qalasy ákiminiń orynbasary Erjan Babaqumarovtyń tóraǵalyǵymen Koronavirýs aýrýyn taratpaý jáne boldyrmaý jónindegi óńirlik shtabtyń baqylaýynda tur.
Tileýhan Ábildaev áýejai, vokzal aýmaǵyndaǵy koronavirýstyq infektsiianyń aldyn alý sharalaryn saqtaý úshin atap aitqanda dezinfektsiialyq qorǵanys quraldaryna tekserý júrgizilgenin habarlady.
Koronavirýsqa qarsy is-qimyl boiynsha sanitarlyq aldyn alý sharalaryn iske asyrý úshin jeke gigiena erejelerin qatań saqtaý, qoldy tiisti dezinfektsiialyq quraldarmen súrtý, sondai-aq adamdar kóp jinalatyn jerlerden aýlaq bolý usynylady.
«Bul infektsiianyń (koronavirýs) taralýyn boldyrmaý úshin asa qajettilik bolmasa kópshilik, adamdar kóp jinalatyn oryndarǵa barmaýǵa keńes beriledi. Qazir JRVI men tumaý aýrýynyń bastalǵan kezeńi. Kóp nárse jeke gigienaǵa bailanysty. JRVI men tumaýmen syrqattaný kezeńinde adam osy infektsiiany ózderiniń jaqyndaryna, týǵan-týystaryna, birge jumys isteitin áriptesterine taratpaý úshin tiisti sharalardy qoldaný kerek», — dedi T. Ábildaev.
