Almatylyqtar Medeý aýdany Kerei-Jánibek handar kóshesi boiyndaǵy 300 túp aǵashtyń zańsyz kesilgenin aityp shaǵymdandy. Ákimdik ol jerdi tekserdi, dep habarlaidy QazAqparat.
Belsendilerdiń kinálilerdi jazalaý týraly qoiǵan talaby jelide jariialandy.
«Kerei-Jánibek handar kóshesi, 368 mekenjaiynda arasynda «Qyzyl kitapqa» engeni bar, 300 túp aǵash kesilgen. Aiyptylardy qylmystyq jaýapkershilikke tartýdy talap etemiz»,-dep jazdy ekobelsendi Saltanat Tashimova Facebook paraqshasynda.
Osyǵan bailanysty qalalyq jasyl ekonomika basqarmasy aǵashtar 1,15 ga ýchaskesinde kesilgenin habarlady. Onyń 1 ga aýmaǵy nysanaly maqsatta – kemping qurylysy úshin, taǵy 0,15 ga – jeke turǵyn úi qurylysy (JTQ) úshin kesilgen.
«Bul aýmaq kemping salýǵa arnalǵandyqtan jasyl ekpe erejesine sáikes aǵash kesýge ruqsat alý qajet, alaida JTQ aýmaǵynda aǵash otaýǵa arnaiy ruqsat talap etilmeidi. Jasyl ekonomika basqarmasynyń mamandary tabiǵatty qorǵaý prokýratýrasy jáne politsiiamen birlesip tekserýge shyqty, biraq, olardy kúzet ishke qarai ótkizgen joq. Kelesi kúni basqarma men botanikalyq baq mamandary qoǵam múshelerimen birge oqiǵa ornyna barǵan soń 300-ge jýyq aǵashtyń zańsyz kesilgeni týraly akt jasaldy», - dep naqtylady basqarmadan.
Aǵashtardyń tuqymy men túrleri áli resmi anyqtalǵan joq. Botanikalyq baq zerthanalyq zertteý nátijesin 3-5 kún ishinde usynady.
Aldyn ala derek boiynsha Qazaqstannyń Qyzyl kitabyna engen sivers alma aǵashtary kesilgen.
