Tanymal ánshi Almas Kishkenbaev kóp jyldan beri alǵash ret kólemdi suhbat berip, basynan ótken qiyn kúnder týraly syr shertti. Sońǵy bir jyldaǵy ózgerister ánshini ishimdikke salynýǵa májbúrlep, sýitsidke deiin jetkizgen.
Ánshi, tipti, maskúnemdikten arnaiy emdeitin jerge qaralǵan. Dese de, ol dál qazir ishimdikke jolamaitynyn aitady.
"Ishimdikke salynyp kettim dep aita almaimyn. Biraq sál jaqyndaý bolǵanym ras. Iaǵni mendegi artyq salmaq sonyń kesirinen. Sońǵy kezde ómirimde bolyp jatqan ózgeristerge bailanysty bul úsh esege artyp ketti. Bastysy, ol jaman nárseden qazir alyspyn, ómirimde múldem joq. Eshqashan jaqyndamaimyn. Arnaiy emdeletin jerge barýyma týra keldi", — dedi Almas Kishkenbaev Gákký arnasynyń "Shyny kerek" baǵdarlamasynda.
Aitýynsha, ózin toqtata almaityndai dárejege qalai jetkenin baiqamai qalǵan. Sol qiyn sátterde ishimdiktiń janyn jubatqanyn da jasyrmady. Munymen qatar, ánshi alǵash ret ákesi týraly suraqqa jaýap berdi. Ákesiniń kim ekenin osy kúnge deiin anasynan surap kórmegen eken.
Birneshe kún buryn jubaiy Móldir ajyrasqandaryn rastap jelide post jazǵan bolatyn. Ánshi de suhbatynda bul aqparattyń ras ekenin moiyndady. Zań júzinde aiyrylysqandaryna bir jylǵa taiap qalǵan eken. Eks-ǵashyqtar bir-birimen kórispese de, ákesi qyzdarymen kúndelikti esh kedergisiz júzdesip turady.
"Ómirimde ne bolyp jatqanyn ózim bilmeimin. Shynymdy aitsam, osy nárse bolyp jatqan sátte "Olarsyz qalai ómir súremin?" dep oiladym. Men bul suraqqa eshqandai jaýap taba almadym. Bir aitarym bar: Men eshkimdi tastap ketken joqpyn, eshkimniń sońynan da ketpedim", — dedi ol.
Ári qarai ánshi qandai jaǵdai bolmasyn, burynǵy áielimen qaita tatýlasýǵa qadam jasamaitynyn meńzedi. Budan ózge ol ómirden baz keship, terezeden sekirip ketpek bolǵan sátti esine aldy. Bul raiynan qaitýyna qyzy sebepshi bolǵan eken.
"Munyń barlyǵy jańaǵy jaman nárseniń áseri boldy. Terezeniń aldynda turǵanymda Zereniń maǵan qońyraý shalǵany toqtatty. Eshkimdi jamandamaimyn, jamandai da almaimyn", — dep Almas Kishkenbaev bul jaǵdaidyń bárine ózinen basqa eshkimdi kinálamaitynyn aitty.
