Foto: QR MAM
2025 jyldyń 10–13 shildesi aralyǵynda Belarýs Respýblikasynda «Vitebskidegi Slavian bazary» XXXIV Halyqaralyq óner festivali ótti. Qazaqstan atynan baiqaýǵa Jetisý oblystyq Dánesh Raqyshev atyndaǵy filarmoniiasynyń ánshisi Almagúl Battalieva qatysty, dep habarlaidy Ult.kz.
Finalda ánshi «Vechnost» kompozitsiiasyn oryndap, kórermendi talantymen tánti etti. Kópshiliktiń kóńilinen shyǵyp, qazylar alqasynyń joǵary baǵasyna ie boldy. Ónerpaz eki baiqaý kúniniń qorytyndysy boiynsha 137 upai jinap, festivaldiń Gran-pri júldesin jeńip aldy.
Almagúl Battalieva – Almaty qalasynyń týmasy, daryndy jas ánshi. Erte jastan vokaldyq qabileti anyq baiqalǵan. 14 jasynda P. I. Chaikovskii atyndaǵy Almaty mýzykalyq kolledjine oqýǵa túsken. Sonymen qatar Almagúl birneshe aspapty – akkordeon, fortepiano jáne ýkýleleny erkin meńgergen. Ol «Jas Qanat – 2023» festivali, «Almatym júregimde» halyqaralyq baiqaýy syndy bedeldi mýzykalyq jarystarda joǵary deńgeide óner kórsetip, kásibi sheberligin birneshe márte dáleldegen.
