Qazaqstandyq avtomobil kompaniiasy Allur D. Serikbaev atyndaǵy Shyǵys Qazaqstan tehnikalyq ýniversitetimen (ShQTÝ) jáne S. Ótebaev atyndaǵy Atyraý munai jáne gaz ýniversitetimen (AMjGÝ) birlesip, ónerkásip, bilim berý jáne ǵylym arasyndaǵy ózara is-qimyldyń jańa modelin damytyp jatyr, dep habarlaidy ult.kz.
Bastamaǵa halyqaralyq seriktester retinde Koreia Respýblikasynyń Hanbat National University jáne Kyungsung University ýniversitetteri qatysady.
Yntymaqtastyqtyń negizgi elementi Allur Isker óndiristik kafedrasy bolady. Munda mamandar daiarlaý men ǵylymi zertteýler kásiporyndardyń naqty tehnologiialyq mindetterine negizdeletin bolady.
Joba Allur kompaniiasynyń Qazaqstanda injenerlik quzyretterdi damytý jónindegi júieli jumysyn jalǵastyrady jáne Prezident Qasym-Jomart Toqaevtyń injenerlik ult qalyptastyrý, adami kapitaldy damytý, tehnikalyq mamandyqtardyń bedelin arttyrý jáne ǵylym men ekonomikanyń naqty sektory arasyndaǵy bailanysty nyǵaitý jónindegi baǵytyna sáikes keledi.
Allur Isker jumysynyń negizine «óndiristik mindet – ǵylymi zertteý – tehnologiialyq sheshim – engizý» kezeńdik qaǵidaty alynady.
Allur avtomobil óndirisi, tsifrlandyrý, jasandy intellekt, avtomattandyrý, robottandyrý jáne sapany baqylaý salalarynda naqty mindetter qalyptastyrady. Olardy sheshý úshin ýniversitetter zertteýshilerdi, oqytýshylardy, doktoranttardy, magistranttar men stýdentterdi biriktiredi, al kompaniia injenerleri jobalardy tikelei óndiriste súiemeldeitin bolady.
Perspektivaly baǵyttardyń qatarynda kompiýterlik kórý, sapany intellektýaldy baqylaý, jabdyqtardyń aqaýlaryn boljaý, tsifrlyq egizder, óndiristik derekterdi taldaý, jańa materialdar jáne komponentterdi oqshaýlaý bar.
Osylaisha, Allur tek jaýapty jumys berýshi retinde ǵana emes, sonymen qatar eldegi injenerlik bilim men qoldanbaly ǵylymdy damytýǵa belsendi qatysatyn indýstriialyq seriktes retinde de áreket etedi. Kompaniia dýaldy bilim berýdi, óndiristik tájiribeni jáne injenerlik tálimgerlikti júieli túrde damytyp, jekelegen bilim berý bastamalarynan óziniń qoldanbaly R&D júiesin qalyptastyrýǵa kóship jatyr.
Joba Qazaqstannyń birneshe óńiriniń quzyretterin biriktiredi: Qostanai oblysyndaǵy Allur avtomobil óndirisi, Shyǵys Qazaqstandaǵy ShQTÝ-dyń injenerlik jáne ǵylymi bazasy jáne Atyraý oblysyndaǵy AMjGÝ-dyń tehnikalyq quzyretteri. AMjGÝ jobaǵa kólik tehnikasy, mashina jasaý, avtomattandyrý jáne robototehnika salalaryndaǵy saraptamasymen úles qosady. ShQTÝ qoldanbaly injenerlik jobalardy iske asyrýdyń negizgi ǵylymi-bilim berý alańdarynyń birine ainalady.
Mundai model óńirlerdiń bir-birin kúsheitýine múmkindik beredi: kásiporyndar tehnologiialyq suranysty qalyptastyrady, ýniversitetter bilimdi shoǵyrlandyryp, mamandar daiarlaidy, al óndiris ázirlemelerdi synaý jáne engizý alańyna ainalady.
Allur Isker jobasynyń mańyzdy bóligi Hanbat National University jáne Kyungsung University ýniversitetterimen yntymaqtastyq bolady. Koreialyq seriktester mehanikalyq injeneriia, mehatronika, robototehnika, jasandy intellekt jáne tsifrlyq tehnologiialar salalaryndaǵy saraptamasyn usynady. Qazaqstan ónerkásibi men ýniversitetteriniń múmkindikterin halyqaralyq quzyrettermen biriktirý injenerlerdi praktikalyq daiarlaýdy keńeitýge jáne birlesken qoldanbaly zertteýlerdi damytýǵa múmkindik beredi.
Taǵy bir baǵyt perspektivaly meditsinalyq tehnika óndirisine mamandar daiarlaý bolady. Allur jáne Silk Road Qazaqstanda ýltradybystyq diagnostikalyq jabdyq óndirý josparlaryn qarastyryp jatyr. Kadrlar daiarlaýdyń negizine ShQTÝ-dyń Semei meditsina ýniversitetimen birlesip júzege asyryp otyrǵan «Meditsinalyq injiniring (Meditsinalyq tehnika)» baǵdarlamasynyń tájiribesi alynýy múmkin.
Óndiristik múmkindikterdi, ShQTÝ-dyń injenerlik quzyretterin jáne meditsinalyq saraptamany biriktirý meditsinalyq jabdyqtardy oqshaýlaý josparlaryn Qazaqstannyń meditsinalyq aspap jasaý salasyndaǵy ózindik quzyretterin damytýmen bailanystyrýǵa múmkindik beredi.
Allur Isker aiasyndaǵy praktikalyq jumysty nátijelerin birneshe ai ishinde tikelei óndiriste tekserýge bolatyn jobalardan bastaý josparlanyp otyr. Olardyń qatarynda mashinalyq kórý, óndiristik aqaýlardy taldaý, jabdyqtardy monitoringteý jáne tehnologiialyq operatsiialardy tsifrlandyrý bar. Sátti sheshimder uzaq merzimdi R&D jobalaryna, magistrlik jáne doktorlyq zertteýlerge, sondai-aq kásiporyndarda keiinnen engizýge negiz bola alady.
Allur kompaniiasynyń strategiialyq mindeti – bilim berý, ǵylym jáne óndiris arasyndaǵy turaqty bailanysty qalyptastyrý jáne zamanaýi tehnologiialarmen jumys istep qana qoimai, el ishinde ózindik injenerlik sheshimder jasai alatyn qazaqstandyq injenerlerdiń jańa býynyn qalyptastyrýǵa qatysý.
