«Nur Otan» Respýblikalyq qoǵamdyq qabyldaý bólmesiniń jetekshisi Áliia Sadyrbaeva eldegi sońǵy jaǵdailarǵa qatysty pikirin bildirdi. Ol beibit túrde bastalǵan mitingtiń jappai tártipsizdikke ulasqanyn buqaralyq aqparat quraldarynan estigen.
«Bastapqyda alańǵa sheginer jeri joq adamdardyń shyqqany belgili. Olardyń kózdegeni bir-aq nárse boldy – biliktiń ózderine qulaq asýy. Bárimizge keiin málim bolǵandai, adamdardyń jappai alańǵa shyǵýyna gaz baǵasynyń kúrt qymbattaýy túrtki boldy. Al bizdiń partiiamyz – «Nur Otan» ótken jyl ishinde Mamin úkimetine birneshe ret halyq úshin basty mańyzdy máseleler – birinshi kezekte qajet azyq-túlik baǵasynyń, tarifterdiń ósýi, onyń ishinde Jańaózendegi suiyltylǵan gaz baǵasynyń ósýi ekenin eskertken bolatyn», - dep jazdy Áliia Sadyrbaeva óziniń Facebook jelisindegi paraqshasynda.
Onyń aitýynsha, partiia jyl boiy eldegi qoǵamdyq-saiasi ahýalǵa júieli túrde monitoring jasap, onyń nátijeleri týraly ýákiletti organdardy habardar etken. Qoǵamdaǵy kóńil-kúidiń ózgerý úrdisi narazylyq deńgeiiniń turaqty túrde arta túskenin kórsetken. Degenmen, úkimet bul usynymdardy eleýsiz qaldyrǵan.
Jappai beibereketsizdik kezinde qoǵamdyq qabyldaý bólmeleriniń qyzmetkerleri óz oryndarynda bolyp, jumystaryn toqtatqan emes. Biz oqiǵanyń barysyn jiti qadaǵalap, bizge júgingen jandardyń barlyǵyna qolushyn berdik, deidi Áliia Sadyrbaeva.
Partiiaǵa 1 qańtardan bastap 1771 adam júginse, onyń 535-i táýlik boiy jumys isteitin «111 shuǵyl qyzmet» bailanys ortalyǵyna habarlasqan.
«Bireýge unasyn, unamasyn, adamdar óz problemasymen bileýshi partiiaǵa júginýde. Bizdiń partiiamyz olarǵa naqty kómektesip otyr!», degen partiia ókili qoǵamdyq qabyldaý bólmeleriniń qyzmetkerleri jyl saiyn orta eseppen 200 myńnan astam azamatpen kezdesip, kúrdeli máselelermen keletin myńdaǵan azamattarǵa kómek kórsetetin basa atap ótti.
