QR Premer-Ministri Álihan Smaiylov Ózbekstanǵa jumys sapary aiasynda ÓR Prezidenti Shavkat Mirzieevpen kezdesip, ÓR Premer-Ministri Abdýlla Aripovpen kelissóz júrgizdi, dep habarlaidy primeminister.kz.
Premer-Ministr Á. Smaiylov Sh. Mirzieevpen kezdesý barysynda Qazaqstan men Ózbekstan arasyndaǵy ekijaqty qarym-qatynas ózara senimge jáne túsinistikke negizdelgen strategiialyq seriktestik pen odaqtastyqtyń jarqyn kórinisi ekenin atap ótti.
«Sizdiń ótken jyldyń jeltoqsan aiynda Qazaqstanǵa jasaǵan memlekettik saparyńyz Qazaqstan men Ózbekstannyń keń aýqymdy yntymaqtastyǵyn damytýǵa úlken serpin berdi. Eki eldiń úkimetteri Sizdiń jáne QR Prezidenti Qasym-Jomart Kemeluly Toqaevtyń arasynda qol jetkizilgen ýaǵdalastyqtardy naqty iske asyrý maqsatynda belsendi jumys istep jatyr. Bizdiń odaqtastyq qatynastarymyzdyń qýatty ári ornyqty ekonomikalyq platformasyn qurýǵa erekshe kóńil bólinip otyr», — dedi Smaiylov.
QR Premer-Ministri ózara yntymaqtastyqtyń damý qarqyny joǵary ekenin atap ótti.
Ózbekstan – Qazaqstannyń Ortalyq Aziiadaǵy negizgi saýda seriktesi. 2021 jyldyń qorytyndysy boiynsha ekijaqty saýda kólemi 33%-ǵa artyp, $4,3 mlrd qurady. Taiaý jyldary atalǵan kórsetkishti $5 mlrd-qa deiin ulǵaityp, orta merzimdi perspektivada $10 mlrd-qa jetkizý josparda bar. Qazaqstan men Ózbekstanda 3 myńǵa jýyq birlesken kásiporyn jumys isteidi.
QR Premer-Ministri mashina jasaý, jeńil ónerkásip jáne óńdeýshi sektordyń basqa da salalaryndaǵy Qazaqstan-Ózbekstan yntymaqtastyǵynyń joǵary serpinin atap ótti. Avtomobil jasaýda, aýyl sharýashylyǵy tehnikasy óndirisinde jáne toqyma salasynda 5 birlesken joba iske asyrylyp jatyr. Qurylys indýstriiasy men mashina jasaýda $365 mln jýyq somaǵa 7 joba pysyqtalýda.
Elder arasynda saýda-ekonomikalyq yntymaqtastyq jónindegi prezidentterdiń arnaiy ókilderiniń tetigi engizildi. Eki eldiń shekarasynda «Ortalyq Aziia» halyqaralyq ónerkásiptik kooperatsiia ortalyǵyn qurý jobasyn iske asyrý boiynsha jumystar atqarylyp jatyr.
Smaiylovtyń Ózbekstan Respýblikasynyń Premer-Ministri A. Aripovpen kelissózi barysynda saýda-ekonomikalyq, investitsiialyq, sý-energetikalyq, tranzittik-kólik, qurylys, aýyl sharýashylyǵy, toqyma, avtomobil jasaý, mádeni-gýmanitarlyq jáne basqa da salalardaǵy yntymaqtastyqty odan ári damytýdyń kóptegen máseleleri talqylandy.
Syrdariia ózeni basseinindegi sý sharýashylyǵy jaǵdaiyna jáne Qazaqstan Respýblikasynyń ońtústiktegi óńirlerindegi sýarmaly jerlerdi vegetatsiialyq kezeńde sýmen qamtamasyz etýge erekshe nazar aýdaryldy.
Sapar qorytyndysy boiynsha aýyl sharýashylyǵy salasynda orta merzimdi perspektivaǵa arnalǵan ekijaqty yntymaqtastyqty jandandyrý jónindegi jol kartasyna qol qoiyldy.
«Azyq-túlik kelisim shart korporatsiiasy» UK» AQ ózbek tarapyndaǵy áriptesimen Ózbekstan Respýblikasynan kókónis ónimderi men kartopty satyp alýǵa shekti kelisimshart jasasty.
Eki eldiń isker toptarynyń ókilderi mashina jasaý, AÓK jáne logistika salalarynda jalpy somasy $661 mln quraityn birqatar kommertsiialyq qujatqa qol qoidy.
