QR Premer-Ministriniń birinshi orynbasary- Qarjy ministri Álihan Smaiylov bilim kúnine orai Nur-Sultan qalasyndaǵy №22 mektep-gimnaziianyń oqýshylaryna azamattyq jáne patriotizm taqyrybynda sabaq ótkizdi, dep habarlaidy "Ult aqparat".
Á.Smaiylov balalardy jańa oqý jylynyń bastalýymen quttyqtap, ómirdegi eń qyzyqty kezeń, baǵa jetpes bilim men daǵdylardy igerý ýaqyty, sondai-aq naǵyz dostardy keziktiretin shaq-mekteptegi kezeń ekenin atap ótti.
Ol sabaq barysynda Úkimettiń qyzmeti týraly jáne Qarjy ministrligine júktelgen mańyzdy máseleler týraly aitty. «Qazirgi ýaqytta sáttilikke jetý úshin únemi úirenip, ózindi-óziń jetildirip otyrýyń tiis. Biz oilaýdy jáne sheshim qabyldaýdy, intellektýaldy jáne rýhani bai tulǵa bolýdy úirenýimiz qajet. Al óz eliniń patrioty bolý úshin tarihty oqyp, ata-babalaryńyzben maqtana bilýińiz kerek. Olarǵa laiyqty bolýǵa umtylý mańyzdy», - dedi Á.Smaiylov oqýshylarmen áńgime barysynda.
Balalar óz kezeginde qonaqqa qyzyqtyrǵan suraqtaryn qoidy.
Kezdesý sońynda Á.Smaiylov oqýshylarǵa oqýda sáttilik, bilimge degen qushtarlyq pen maqsatqa jetýde tabandylyq tiledi.
