Shýhrat Ibragimov ERG menedjerler keńesiniń quramyna kirdi, - dep habarlaidy Tengrinews.kz.
Eurasian Resources Group ("ERG") búgin Shýhrat Ibragimov Menedjerler keńesine taǵaiyndalǵanyn jariialady: sheshim 2021 jyly naýryzdyń 3-i kúshine endi. Shýhrat Ibragimov sonymen qatar menedjerler keńesi janyndaǵy Aýdit jónindegi komitet, Syiaqylar jónindegi komitet pen Birigý men jutylý jónindegi komitterdiń quramyna kirdi.
Osylaisha, biyl aqpanda qaitys bolǵan ERG negizin qalaýshylardyń biri - Alidjan Ibragimovtyń menedjerler keńesindegi ornyn uly Shýhrat Ibragimov basyp otyr.
Menedjerler keńesine taǵaiyndalǵanǵa deiin Shýhrat Alidjanuly alty jyl boiy ERG-diń biznesti damytý jónindegi departamentine jetekshilik etken. Ol búginde kobalt óndirisiniń kólemi boiynsha álemde ekinshi, al mys óndirý boiynsha eń iri óndirýshiler qataryna engen Metalkol RTR, ERG-diń Braziliiadaǵy kiriktirlgen temir keni men logistikalyq BAMIN jobasy syndy birqatar aýqymdy halyqaralyq bastamalardy ázirlep, iske qosýǵa úles qosqan.
"Men birneshe jyl ERG-degi jetekshi laýazymdarda qyzmet ettim. Sonda jinaqtaǵan tájiribe men ákemniń ónegesine arqa súiep, top pen onyń steikholderleriniń keń aýqymyna barynsha paidaly bolarmyn degen úmittemin", - dedi Shýhrat Ibragimov.
Shýhrat Ibragimov Orta Aziiadaǵy eń iri altyn óndirýshi kásiporyndardyń biri - "Alians Altyn"-nyń atqarýshy emes direktory. Sondai-aq, Qazaqstan Respýblikasyndaǵy saqtandyrý naryǵynyń kóshbasshylarynyń biri - "Evraziia" saqtandyrý kompaniiasy men áleýmettik mańyzdy qarjy institýty sanalatyn Eýraziialyq bank direktorlary keńesiniń múshesi. Odan bólek, Túrkiiamen iskerlik bailanystardy nyǵaitý maqsatynda qurylǵan "YABİAD" - halyqaralyq investorlar qoǵamdastyǵy men sheteldik investorlar keńesiniń vitse-prezidenti.
Shýhrat Ibragimov birqatar qaiyrymdylyq sharalaryna da qatysady. Atap aitqanda, Afrika men Aziia turǵyndarynyń sýǵa qoljetimdigi men azyq-túlik qaýipsizdigin qamtamasyz etýdi kózdegen ulybritaniialyq "I am part of" qaiyrymdylyq uiymy qomqorshylarynyń keńesine jetekshilik etedi. Sonymen qatar, halyqaralyq Aziia kinofestivali keńesine jetekshilik etip, álemniń túrli elindegi birqatar mádeni jobaǵa qoldaý kórsetip keledi.
Shýhrat Ibragimov Londondaǵy Eýropa biznes mektebin jáne Beijińdegi til men mádeniet ýniversitetin támamdaǵan. Aǵylshyn, orys, frantsýz jáne túrik tilderinde erkin sóileidi, jáne qytai tilin jumysqa qajetti kelemdi biledi.
