Búgin - Alǵys aitý kúni. Alǵys aitý kúni elimizde 2016 jyldan bastap Elbasynyń Qazaqstan halqy assambleiasynyń XXII sessiiasynda aitqan bastamasy boiynsha atap ótilip keledi. Osynaý ataýly dataǵa orai elimizdiń ár túkpirinde saltanatty is-sharalar jalǵasyn tabýda.
Búgin «Alǵys aitý» kúnine orai Batys Qazaqstan oblsynda etnomádeni birlestikterdiń tóraǵalary men ókilderi, aqsaqaldar men qala turǵyndary, stýdent jastarymen mektep oqýshylary qatysýymen «Qazaq halqyna myń alǵys» eskertkishi janynda jiyn ótkizilip, gúl shoqtary qoiyldy.
- Barshańyzdy búgingi merekemen quttyqtaimyn. Bul erekshe mereke. Sebebi 1-naýryz Elbasymyzdyń sheshimimen Assambleia kúni jáne de Alǵys aitý kúni bolyp jariialanǵan bolatyn. Bul elimizde turyp jatqan barlyq etnostardyń yntymaǵy, birligi men dostyǵynyń naǵyz simvolyna ainalǵan biregei institýt. Alǵys aitý kúni – bul qiyn-qystaý ýaqytty birge ótkergen jáne eń qysqa merzim ishinde Táýelsiz Qazaqstandy birge qurǵan azamattardyń bir-birine degen ózara qurmetiniń, meiirimdiliginiń, dostyǵynyń merekesi. Bul ortaq tarihymyzǵa, jyldar boiy elimizde dostyq pen ózara túsinikti qalyptastyrǵan aǵa urpaqqa, bizdiń ákelerimiz ben atalarymyzǵa degen qurmet. Sondyqtan ortaq merekemiz qutty bolsyn!,-dedi saltanatty sharaǵa qatysqan oblys ákimi Altai Kólginov.
Sondai-aq merekelik sharaǵa jinalǵandardy «Haimat» nemis etnomádeni birlestiginiń tóraǵasy Edýard Fritsler, «Vainah» sheshen-ingýsh etnomádeni birlestiginiń aqsaqaldar keńesiniń tóraǵasy Abýiazid Hasiev, korei etnomádeni birlestiginiń tóraǵasy Vitalii AN jáne taǵy basqa etnomádeni birlestikteriniń ókilderi quttyqtady.
Alǵys aitý kúnine orai Aqtóbe oblysynyń barlyq eldi mekenderinde keń aýqymdy qaiyrymdylyq aktsiiasy uiymdastyryldy. 3 myńnan asa aqtóbelikke jalpy somasy 27,2 mln. teńgege áleýmettik kómek kórsetildi.
Oblys ákimi Ońdasyn Orazalin qatysqan basty resmi saltanatty shara Aqtóbedegi «Qazaq halqyna myń alǵys» eskertkishiniń aldyndaǵy alańda ótti. Munda ulttyq taǵamdardyń jármeńke-kórmesi men azyq-túlik jármeńkesi uiymdastyrylyp, oǵan oblystyń barlyq aýdandary qatysty.
Saltanatty sharany «Qazaq eline myń alǵys» teatrlandyrylǵan kórmesi ashty. Oblystaǵy barlyq 18 etnomádeni birlestiktiń ókilderi bi jáne mýzykalyq nómirlerimen sahnaǵa shyqty. Olardyń árqaisysy alǵystaryn aityp, ár túrli tilde óz Otany – Qazaqstandy madaqtady.
«Alǵys aitý kúni – bul barlyq ulys ókilderiniń bir-birin jáne barlyǵy birigip qazaq halqyna tolyqqandy memlekette, halyqaralyq kelisim men beibitshilik ornaǵan elde ómir súrip jatqandary úshin alǵystaryn bildiretin kún. Bul rizashylyq bizdiń árdaiym júregimizde, biraq biz búgin ony jumyla, ásirese Qazaqstanǵa qonys aýdarǵan halyqtardyń ókilderi bolyp bildire alamyz»,- dedi Qazaqstan káristeri qaýymdastyǵynyń Aqtóbe filialy tóraǵasy Konstantin Tshai.
«Táýelsizdik jyldary, tarihi Otanǵa oralý múmkindigi týǵan kezde aqtóbelik bolgarlardyń eshqaisysy ketpedi, óitkeni osy kúnge deiin alǵashqy qonys aýdarýshylardyń urpaqtary turyp jatqan kishkene aýyldary – Bolgarkany ózderiniń kishi Otandary dep sanaidy. Osy bir mereke kúni halqymnyń atynan bizge Otan bolǵan Uly dalaǵa úlken alǵysymdy bildiremin»,- dedi oblystyq «Viara» bolgar etnomádeni birlestiginiń basshysy Anastasiia Podolianova.
Aqtóbelikterdi quttyqtaǵan óńir basshysy Alǵys aitý kúni bizdiń ortaq tarihymyzǵa degen qurmet, búkil qazaqstandyqtyń bir-birine degen meiirimdiligi, dostyǵy pen mahabbaty merekesi ekenin atap ótti.
«Otandastarymyzdyń yqylasynyń arqasynda osy bir mereke kúnderi muqtaj otbasylarǵa qaiyrymdylyq kómek kórsetýde úlken jumystar júrgizilýde. Bizdiń barlyq qaltaly azamattarymyzǵa, kásiporyn basshylary men jalpy jurshylyqqa igi isterdi júzege asyrýǵa belsendi túrde qatysqandary úshin alǵys bildirgim keledi. Bizder osyndai jobalardy birlese júzege asyra otyra ózimizdiń aýyzbirshiligi men taǵdyryna bei-jai qaramaitynymyzdy kórsetemiz»,- dedi O.Orazalin.
Al, Atyraýda ár túrli ult ókilderi merekeni atap ótýge jinaldy. Saltanatty sharada Atyraý oblysynyń ákimi Nurlan Noǵaev bul kúnniń barlyq qazaqstandyqtar úshin mańyzdylyǵyna toqtalyp, elimizdegi san túrli ult pen ulys ókilderiniń Alǵys aitý kúninde darhan kóńilmen qabyldaǵan qazaq jerine rizashylyqtaryn bildiretinin atap ótti.
-Halqymyz qiyn kezeńderde qanshama adamdardy qabyldady, olarǵa Qazaqstan týǵan úilerindei bolyp ketti. Memleket basshysynyń saiasaty barlyq etnostardyń teń quqyly bolýyna negizdelgen. Elimizdegi turaqtylyq, ultaralyq kelisim - memleketimizdiń tabysy. Bul iste barshańyzdyń úlesińiz bar, - dedi Nurlan Noǵaev.
Oblys ákimi óńirdegi 20 etnomádeni birlestiń jetekshilerine rizashylyq bildirdi. Qazaqstan halyqtary Assambleiasynyń etnostardyń mádenietin, birligin damytýǵa qosyp júrgen úlesi zor ekenine toqtaldy.
- Bul bizge aldymyzda turǵan mindetterdi oryndaýǵa múmkindik beredi. Muny Prezident Nursultan Nazarbaev "Nur Otan" partiiasynyń sezinde de airyqsha atap ótti. Úkimettiń, jergilikti atqarýshy organdardyń basty mindeti-azamattarǵa áleýmettik qoldaý kórsetý, ál-aýqatyn arttyrý. Elbasynyń barlyq tapsyrmalaryn oryndaý memleketimizdiń ekonomikalyq damýyna jol ashady. Buǵan bizde múmkindik mol, - dep atap ótti Nurlan Noǵaev.
