Reseidiń Krasnoiar ólkesiniń Kansk qalasyndaǵy №2 mektepte 1 qyrkúiekke arnalǵan saltanatty jiyn aldynda jetinshi synyp oqýshysy muǵalimderge shabýyl jasady, dep habarlaidy ult.kz.
Aldyn ala málimet boiynsha, oqýshy aldymen burysh ballonyn shashyp, keiin pyshaq shyǵarǵan. Pedagogterge kómektesýge oqýshylardyń biriniń anasy kelgen. Áiel shabýyl jasaǵan qyzdy dálizge qarai iterip shyǵarǵan.
Oqiǵa ornyna tergeýshiler jumys istep jatyr. Shabýyl saldarynan jeti adam zardap shekken. Olardyń beseýi – bala, ekeýi – eresek adam.
Krasnoiar ólkesiniń Densaýlyq saqtaý ministrliginiń málimetinshe, zardap shekkenderdiń barlyǵy Kansk aýdanaralyq aýrýhanasyna jetkizilgen. Dárigerler olardy tekserip, qajetti meditsinalyq kómek kórsetken. Keiin barlyǵy ambýlatoriialyq baqylaýǵa jiberilgen.
Mekteptegi fizika pániniń muǵalimi Olga Kostrova qyzdyń birneshe muǵalimge qatarynan burysh ballonyn shashqanyn aitty. Onyń sózinshe, ballonnan shashyraǵan zat kózine tigen pedagogter zardap shekken.
Oqiǵanyń ózge kýágerleri jasóspirimniń shabýylǵa deiin ózin oǵash ustaǵanyn aitqan. Baza málimetinshe, qyzdyń qarashyǵy úlkeiip, ózi qatty qobaljyǵan. Buǵan deiin onyń mektepte eleýli problemalary bolmaǵany habarlandy. Alaida oǵan syrtqy kelbetine qatysty eskertý jasalyp, tym ashyq kiinbeýin jáne boianbaýyn suraǵan.
Shabýyl bolǵan kúni oqýshy mektepte shamamen eki saǵat bolǵan. Synyp saǵaty bastalar aldynda ol dárethanaǵa kirip, ishinen esikti jaýyp alǵan. Biraz ýaqyttan keiin qolyna pyshaq pen burysh ballonyn ustap shyqqan.
Oqiǵanyń mán-jaiy anyqtalyp jatyr.
