«Astana EKSPO-2017» ulttyq kompaniiasynyń basqarma tóraǵasy Ahmetjan Esimov dúisenbi kúni halyqaralyq kórmege qatysýshy 5 memleketke, atap aitqanda Qytai, Frantsiia, Germaniia, Vengriia jáne Túrkiiaǵa alǵashqy pavilondardy tapsyrdy. Bul týraly vlast.kz saity habarlaidy.
«Biz úshin, bizdiń ulttyq kompaniia úshin erekshe kún bolyp otyr. Sebebi halyqaralyq pavilondar, 1374 orynǵa arnalǵan EKSPO-qalashyq, EKSPO-keńse, ishki ister bóliminiń ǵimaraty jáne Energiiany zertteý ortalyǵy sekildi kórmeniń bes negizgi nysanynyń qurylysy aiaqtaldy. Atalǵan ǵimarattardyń jalpy aýmaǵy 482 myń sharshy metrdi quraidy», - dep málimdedi Esimov pavilondardy tapsyrýdyń saltanatty sharasy barysynda.
Búgingi kún «mazmundyq tolyqtyrýdyń belsendi kezeńiniń bastalýyn» bildiretindigimen mańyzdy dep atap ótti Esimov.
«Kórmeniń ashylýyna 222 kún qalǵanda biz pavilondar men turǵyn úilerdi tapsyrýdy bastadyq. Bul ýaqyt pavilondarymyzdy sapaly túrde toltyrý úshin jetkilikti bolady dep oilaimyn. Ekijaqty bailanysty qamtamasyz etý úshin arnaiy tehnikalyq biýro ashyldy, sonymen qatar akkreditatsiialyq ortalyq jumysyn bastaidy», - dep habarlady ulttyq kompaniia basshysy.
«Ózderińiz kórip otyrǵandai, biz sizderge zań keńesterinen bastap ózgedei uiymdastyrý máselelerine deiin qamtityn kórme qatysýshylaryna arnalǵan jan-jaqty kómek kórsetýge ázirmiz», - dep sózin jalǵastyrdy ol.
Esimov EKSPO jobasynyń kúrdeli daǵdarys ýaqytynda júzege asyrylyp jatqanyn eske salyp ketti. Alaida «memleket basshysynyń tolyqqandy qoldaýymen» ol «daǵdarysqa qarsy eń shynaiy baǵdarlamalardyń birine» ainaldy. Kórme qurylysy men daiyndyǵyna Qazaqstannyń barlyq derlik aimaǵyndaǵy 300-den astam otandyq kásiporyn jumyldyrylǵan.
«Osylaisha joba 50 myńdai jumys ornyn quryp, saqtap qalýǵa múmkindik berdi. Tek osy qurylys alańynyń ózinde ǵana 14 myń adam jumyspen qamtylǵan», - dedi ol.
Kompaniia basshysynyń sózine qaraǵanda, budan bólek nysandar qurylysy kezinde jergilikti kompaniialar 492 mlrd teńgeni quraityn somaǵa jumys atqaryp, qyzmet kórsetken.
«Sfera» ulttyq pavilony, kongress-holl jáne qonaq úi sekildi kórmeniń ózge nysandary boiynsha da jumys kestege sáikes júrgizilip otyr. Kelesi jyly qoǵamdyq oryndardy ázirleýdi, aýmaqty abattandyrýdy uiymdastyrý josparlanýda», - dedi kompaniia tóraǵasy.
Kompaniia ókilderiniń aitýynsha, Vengriia pavilonynyń aýmaǵy 411,9 sharshy metrdi quraidy. Uiymdastyrýshylardyń sózine qaraǵanda, «Bolashaq energiiasy bizdi biriktiredi» degen pavilon taqyryby eldegi energiianyń qoljetimdi kózderiniń geografiialyq jáne ekonomikalyq erekshelikterine negizdelgen. Pavilon sý, kún jáne jel eli bolyp tabylatyn Vengriianyń sipatyn asha túsip, elektr jáne qalalyq josparlaý salasyndaǵy eń sońǵy qurylǵylardy kórsetedi. Sonymen qatar 2017 jyldyń 20 tamyzy kórme aiasyndaǵy Vengriianyń ulttyq kúni bolyp anyqtaldy.
Germaniia pavilonynyń aýmaǵy 1249,5 sharshy metrdi quraidy jáne «Energiiaǵa bastar jolda» dep atalady. Frantsiia 1069,1 sharshy metrden turatyn pavilonǵa ie bolyp, ony «Jasyl damýǵa arnalǵan energetikalyq burylys» dep atady. Jasyl energetika salasyndaǵy óz jumystaryn Frantsiia bolashaq qalasy, jańǵyrtylatyn energiia jáne ekologiialyq kólik túrleri atty úsh taqyryp aiasynda usynady. Qytai 1000 sharshy metrdi quraityn pavilondy aldy. «Jasyl Jibek joly» atty bul nysannyń ereksheligi QHR-diń Jibek jolynyń boiyndaǵy jáne búkil álemdegi memlekettermen energetikalyq seriktestiginiń jańa oiyn ashyp kórsetetin bolashaq energiiasynyń arman teatry bolmaq.
Ult portaly
