Ahmet Iasaýi ýniversiteti men Astana memlekettik qyzmet haby birlesip Túrkistan memlekettik basqarý jazǵy onlain mektebiniń tusaýyn kesti, dep habarlaidy "Ult aqparat".
Jobanyń maqsaty − akademiialyq qoǵamdastyq ókilderi men memlekettik qyzmetshilerdiń áleýetin arttyrý, sondai-aq memlekettik basqarý salasynda bilim men tájiribe almasýǵa qoldaý kórsetý.
Jazǵy mektep baǵdarlamasy eki apta aralyǵynda serpindi tehnologiialar, tsifrlandyrý jáne elektrondyq úkimet, memlekettik qyzmettegi yntalandyrý men meritokratiia, genderlik teńdik, aqyldy qala tujyrymdamasy, BUU-nyń Turaqty damý maqsattaryn júzege asyrý siiaqty memlekettik basqarý salasyndaǵy ózekti máseleler tóńireginde interaktivti dáristerdi qamtidy.
Mektepte bilim alý úshin 150-den astam adam tapsyrys berdi. Olardyń qatarynda otandyq 30 ýniversitettiń, sonymen birge Resei, Ózbekstan jáne Finliandiia elderiniń bes joǵary oqý ornynyń oqytýshylary, doktoranttary men magistranttary bar. Oǵan qosa elimizdiń túrli óńirlerinen memlekettik qyzmetshiler de oqýǵa niet bildirgen.
Mekteptiń saltanatty ashylýynda ýniversitet rektory Janar Temirbekova, ýniversitettiń birinshi vitse-prezidenti Jengiz Tomar jáne Astana memlekettik qyzmet haby Basqarýshy komitetiniń tóraǵasy Alihan Baimenov sóz sóiledi.
Alihan Baimenov sońǵy jyldary ár túrli elderdiń úkimetteri kásibi ári innovatsiialyq, azamattardyń qajettilikteri men suranystaryna sai keletin memlekettik apparatty qalyptastyrýǵa umtylýda dedi. «Bul iste tek qana tájiribe ǵana emes, ǵylymi zertteýler júrgizetin jáne myqty kadr ázirleitin joǵary oqý oryndarynyń bolýy mańyzdy» − dedi Alihan Baimenov. Sonymen qatar Hab jetekshisi elimizde «memlekettik jáne jergilikti basqarý» mamandyǵy boiynsha kadr daiyndaityn elýge jýyq joǵary oqý orny bar, alaida jetekshi oqý oryndary bilim berý baǵdarlamalarymen tanysqanda bul salada mamandar daiarlaý sapasyn arttyrý boiynsha áli de aitarlyqtai kúsh salý qajettigin atap ótti.
Osy turǵyda Alihan Baimenov Habtyń praktikter men jas ǵalymdar, «memlekettik jáne jergilikti basqarý» boiynsha maman ázirleitin joǵary oqý oryndary fakýltetteri tájiribe almasatyn turaqty platforma qurý boiynsha qoldaý kórsetýge daiyn ekendigin aitty.
Hab dáris oqýǵa Grýziia, Ázirbaijan jáne Soltústik Makedoniia elderinde memlekettik basqarý salasynda reformalardy júzege asyrýǵa qatysqan tájiribeli mamandardy shaqyrdy. Sonymen qatar Túrkistan oblysynyń memlekettik organdarynyń basshylary, Ahmet Iasaýi, Stambýl, Marmara jáne AlmaU ýniversitetteriniń professorlary da dáris oqidy.
