Áleýmettik jelide jariialanǵan ádemi qurani sózderdiń artynda jasyryn nasihat bolýy múmkin. Osyndai oiyn Almaty gýmanitarlyq kolledjiniń stýdentterine dintanýshy, magistr Nurmuhammed Meimanqoja jetkizdi, dep habarlaidy QazAqparat.
Bul kezdesýge gýmanitarlyq kolledjde bilim alyp jatqan 45 stýdent qyz qatysty. Spiker dindegi qyz balalarǵa qatysty máselelerdi aitty.
«Jastar destrýktivti aǵymdarǵa ermes úshin ne isteýi kerek? Ǵalamtordaǵy aqparatqa abai bolýy kerek. Islam dinin maqtap jazatyn naqyl sózder, hadister jazylǵan keremet akkaýnttar bolýy múmkin. Adamdar syrly sózge qyzyǵyp kiredi. Basynda mátinde eshqandai kúdik týǵyzar dúnie bolmaýy múmkin. Biraq keiin destrýktivti aǵym saittaryna, aqparattyq resýrstarǵa siltemeler paida bolady. Bylaisha aitqanda, jasyryn nasihat júrgiziledi. Al mundai aqparattyq shabýylǵa jastar tótep bere almaidy. Sol úshin din máseleleri boiynsha kóp málimet alýdyń keregi joq», - dedi Nurmuhammed Meimanqoja.
Sońǵy málimetterge sensek, Siriiaǵa Qazaqstannan 800-ge jýyq adam ketken. Búginde «Jýsan» operatsiiasynyń kómegimen 595 adam qaitaryldy.
Onyń aitýynsha, jat elge ketkender úshin Otan degen uǵym qundylyq bolmai qalady.
«Tólqujatyn alyp, kindik qany tamǵan jerin tárk etip, halifattan pana izdegenderdiń ishki dúniesinde qandai motiv bolýy múmkin? Bul migratsiia otbasy qundylyǵynyń túkke turmaitynyn kórsetti. Sonymen qatar er azamattardyń otbasyn saqtaý, áieldiń qorǵany bolý jáne balalarynyń ómirine jaýapty ekenderin esterinen shyǵarýlary asa qatty oilandyratyn másele bolýy tiis. Kóp jaǵdaida Siriiaǵa ketken áiel zaty óz basyn qaýipke tigip, kúieýleriniń sońynan ketken. Bul jaǵdaida ásirese japa shekkender – balalar. Olardyń taǵdyry, jat jerde jazyqsyz kóz jumǵan balalardyń ólimi – ata-anasynyń jaýapkershiliginde», - dedi spiker.
