Búgin QR Úkimetiniń baspasóz ortalyǵynda ótken baspasóz konferentsiiasy barysynda QR energetika vitse-ministri Suńǵat Esimhanov elektr jelilerin jańǵyrtý jáne jylytý maýsymyna daiyndyq jumystary týraly aityp berdi, dep habarlaidy "Ult aqparat".
Onyń aitýynsha, Qazaqstanda elektr jelilerin jańǵyrtý shtattyq rejimde júrgizilip jatyr.
«Barlyq jetekshi uiymdar tabiǵi monopoliialar sýbektileri bolyp tabylady jáne olardy Tabiǵi monopoliialar komiteti retteidi, sondyqtan bekitilgen investitsiialyq baǵdarlamalary bar tiisti ortasha merzimdi tarifter bar. Sondyqtan tarif arqyly aitarlyqtai mańyzdy jańǵyrtý jumystary júrgizilip jatyr, sonymen qatar jergilikti atqarýshy organdardyń esebinen salynyp jatqan jańa qurylys bar. Sondai-aq, iri qalalardyń mańyndaǵy mekenderde memleket jańa elektr jelileriniń qurylysyn qarjylandyrady, bul turǵydan baqylaý jasalǵan», — dedi energetika vitse-ministri.
Sonymen birge, S. Esimhanov búginde 428 qazandyq jóndeýden ótkenin, bul jyldyq jospardyń 93 paiyzyn quraitynyn aitty.
«Bizdiń elimizde mektepter men aýrýhanalarda avtonomdy qazandyqtar óte kóp, sondyqtan jylýmen qamtamasyz etýde problemalar bolmaidy. Sondai-aq, qaýipsizdik sharalary boiynsha qazandyqtar bólek turýy úshin olardy jertóleden shyǵarý jumystary júrgizilip jatyr», — dedi vitse-ministr.
Sonymen qatar, S. Esimhanov jylý jelileriniń temperatýralyq kesteleri Energetika ministrligi men Energetikalyq qadaǵalaý komitetiniń saittarynda jariialanǵanyn atap ótti. Atalǵan kesteler saqtalmaǵan jaǵdaida, eń aldymen, temperatýralyq jaǵdaidy qamtamasyz etetin jylý berýshi uiymdarmen bailanys ornatý qajet. Ákimdikpen birge qajetti oryndarǵa baryp, sebepterin anyqtaityn komissiialar qurylady.
«Mundai júginýler bizdiń Energetikalyq qadaǵalaý komitetimizge de kelip jatady. Ondai kezde bizdiń aýmaqtyq departamentterimiz dereý máseleni anyqtaýǵa barady. Sondyqtan da aýmaqtyq energetikalyq qadaǵalaý departamentterine qosymsha habarlasýǵa bolady. Barlyq málimetter men koordinattar saitta jariialanǵan», — dedi vitse-ministr.
