QR Premer-Ministri Asqar Maminniń tóraǵalyǵymen ótken Úkimet otyrysynda azyq-túlik baǵasynyń ósýi máselesi qaraldy.
«14 qarashada Aqmola oblysyn damytý jónindegi keńeste Memleket basshysy azyq-túlik baǵasynyń negizsiz ósýine jáne bul máselede tiisti ortalyq jáne jergilikti memlekettik organdar tarapynan durys baqylaý men úilestirýdiń joqtyǵyna nazar aýdardy», — dedi A. Mamin.
Úkimet basshysy jyl basynan beri áleýmettik mańyzy bar azyq-túlik taýarlaryna shekti baǵalar barlyq óńirlerde 15%-dan astam óskenin atap ótti. Qaraqumyq jarmasy (+62,9%), kúrish (+32,3%), un (+27,8%) bárinen qymbattaǵany baiqalady. Óńirler turǵysynan baǵanyń eń kóp ósýi Shymkent pen Qyzylorda, Túrkistan, Almaty, Kókshetaý, Petropavl, Aqtóbe jáne Tarazda baiqalady.
«Bul óńirler ákimdikteri men aýyl sharýashylyǵy, ulttyq ekonomika, saýda jáne integratsiia ministrlikteriniń jetkilikti jumys júrgizbei otyrǵanyn kórsetedi», — dedi A. Mamin.
Premer-Ministr bir apta ishinde áleýmettik mańyzy bar taýarlardyń baǵasyn turaqtandyrý boiynsha qysqa jáne orta merzimge arnalǵan naqty sharalar paketin ázirleitin jumys tobyn qurýdy tapsyrdy.
Úkimet basshysynyń tapsyrmasy boiynsha azyq-túlik taýarlaryna baǵa ósýiniń aldyn alý máselesine jaýap beretin aýyl sharýashylyǵy, ulttyq ekonomika, saýda jáne integratsiia vitse-ministrleri jáne Shymkent jáne Almaty qalalarynyń, Qyzylorda, Túrkistan, Aqmola, Soltústik Qazaqstan, Aqtóbe, Jambyl oblystarynyń ákimderiniń orynbasarlary tártiptik jaýapkershilikke tartylatyn bolady.
