Jyl basynan áleýmettik mańyzy bar azyq-túlik taýarlarynyń baǵalary 2,6 paiyzǵa ósti. Bul týraly búgin Úkimet otyrysynda QR Saýda jáne integratsiia ministri Baqyt Sultanov aitty, dep habarlaidy "Ult aqparat".
«Jyl basynan bastap áleýmettik mańyzy bar azyq-túlik taýarlarynyń baǵalary 2,6 paiyzǵa ósti. Jyldyq mánde olar 13,2 paiyzǵa qymbattady. 3,3 paiyzdy eń joǵarǵy ósim Batys Qazaqstan oblysy jáne Shymkent qalasynda tirkeldi. Olardan keiin taǵy 8 óńirde elimizdegi tirkelgen ortasha deńgeiden joǵary, iaǵni 2,7-den 2,9 paiyzǵa deiin baǵanyń ósimine jol berildi. Bárinen buryn importqa táýeldi ónimderdiń, joǵary eksporttyq suranysy bar taýarlardyń, sondai-aq maýsymaralyq kezeńde dástúrli túrde qymbattaityn kókónisterdiń baǵasy ósim kórsetti», - dedi ol.
Ministrdiń dereginshe, jumyrtqa - óndirýdiń 8,4 paiyzǵa qysqarýy, jem men pestitsidterdiń 25 paiyzǵa qymbattaýy, sondai-aq qus tumaýy taralýy saldarynan qymbattady. Al, kúnbaǵys maiy men qanttyń baǵasynyń ósimine álemdegi baǵalardyń ósýi, kórshi elderdegi egis alqaptaryn qysqarýy jáne eksport ónimniń qymbattaýy sebep boldy.
«Osyǵan orai, Aýyl sharýashylyǵy ministrligi óńirlik atqarýshy organdarmen birlesip, importqa táýeldi taýarlar boiynsha ǵana emes, sondai-aq eksporttyń joǵary úlesi baiqalatyn ónimder boiynsha da óndiristi barynsha ulǵaitýy qajet», - dedi Baqyt Sultanov.
