5G jańa bailanys túrin qurýǵa investitsiialar tartý maqsatynda radiojiilik spektrin paidalanýdyń tólem mólsherlemesin 5 jylǵa 10 ese tómendetý usynyldy. Bul týraly Parlament Májilisinde salyq salý máseleleri zań jobasyn tanystyrý kezinde QR Ulttyq ekonomika vitse-ministri Mádi Tákiev málim etti, dep habarlaidy QazAqparat.
Vitse-ministrdiń aitýynsha, áleýmettik baǵyttar boiynsha tarifterdiń tiimsiz bolýyna orai jáne olardy sýbsidiialaýǵa qarjylandyrýdyń jetispeýine bailanysty tasymaldaýshylarǵa shyǵyn keledi. Mundai shyǵyndardy jabý maqsatynda turaqty áleýmettik mańyzy bar avtokólik tasymaldaryn qosylǵan qun salyǵynan 3 jylǵa bosatý usynylady.
«Halyqaralyq tasymaldar úshin Salyq kodeksinde qosylǵan qun salyǵynyń nóldik mólsherlemesi kózdelgen. Alaida, is júzinde halyqaralyq tasymaldaýdyń bir bóligi bolyp tabylǵanymen, júkti sý kóligine aýystyryp tieý kezindegi teńiz portyna deiingi temirjol tasymaly halyqaralyq bolyp sanalmaidy. Teńiz kóligi arqyly tranzitti damytý úshin jaǵdai jasaý, tranzit qunyn tómendetý maqsatynda mundai tasymaldardy halyqaralyq dep taný ári qosylǵan qun salyǵynyń nóldik mólsherlemesin qoldaný usynylady», - dep túsindirdi M. Tákiev.
Budan bólek, búkil álemde elektrondyq kommertsiia kóleminiń ulǵaiýyna bailanysty poshtalyq tranzittik áleýetti arttyrý maqsatynda halyqaralyq poshta jóneltimderi boiynsha taǵaiyndalǵan operatordyń qyzmetin qosylǵan qun salyǵyn tóleýden bosatý qarastyrylyp otyr.
Sonymen qatar, zań jobasynda 5G jańa bailanys túrin qurýǵa investitsiialar tartý maqsatynda radiojiilik spektrin paidalanǵany úshin tólem mólsherlemesin 5 jylǵa 10 ese tómendetý týraly usynys eskerilgen.
Budan buryn habarlanǵandai, Parlament Májilisinde «Qazaqstan Respýblikasynyń keibir zańnamalyq aktilerine salyq salý jáne investitsiialyq ahýaldy jetildirý máseleleri boiynsha ózgerister men tolyqtyrýlar engizý týraly» zań jobasy tanystyryldy.
Qujat aiasynda jeke tulǵalardyń múlki men jerine salynatyn tólemderdi bir salyqqa biriktirý eskerilgen.
Munymen qosa, kólik quraldary salyǵyn tóleý merzimin aýystyrý usynyldy.
