Almatyda jańa formatta kórsetiletin áleýmettik kómek týraly túsindirý jumystary júrip jatyr. Alataý aýdanyna kúnine 100-ge jýyq adam keńes alýǵa keledi eken. Kóbinese qajetti qujattardan bólek, turǵyndardy tólem júrgizý máselesi qyzyqtyrady.
"Bul kómekti kópbalaly, turmys jaǵdaiy tómen otbasylar alady, otbasynyń tabysy jan basyna shaqqanda kún kóris deńgeiiniń 70 paiyzynan, iaǵni 21 172 teńgeden tómen bolýy kerek. Ol tek kópbalaly ǵana emes, turmys jaǵdaiy tómen otbasylarǵa da qatysty", - deidi Almaty qalasy Alataý aýdany Áleýmettik ál-aýqat bóliminiń basshysy Láilá Orazbaeva.
Basqarma mamandary 4 balasy bar anany mysal retinde keltirip, túsindirip jatyr. Buǵan deiin mundai otbasy ataýly áleýmettik kómekti 63 myń teńge kóleminde alsa, al sáýirden bastap onyń mólsheri 103 myń teńgeden asady, dep jazdy "Almaty" arnasy.
Járdemaqydan bólek, aýylda turatyn kópbalaly otbasylar óz isin bastaý úshin grant jáne shaǵyn nesiege úmitker bola alady. Onyń kólemi 500 myńnan 20 million teńgege deiin jetedi.
