Áleýmettik masyldyqqa boi aldyrǵan jalynsyz ómir salty jas urpaqtyń tárbiesine keri áser etip jatyr. Memleket basshysy Qasym-Jomart Toqaev óz Joldaýynda osyndai másele kóterdi, dep habarlaidy QazAqparat.
«Taǵy bir máselege toqtalǵym keledi. Qazaqstan – áleýmettik memleket. Sondyqtan qiyn jaǵdaiǵa tap bolǵan azamattarǵa jan-jaqty kómek kórsetý – basty mindetterdiń biri. Alaida qoǵamda paternalistik kóńil-kúi jáne áleýmettik masyldyq úrdisi beleń alýda. El ishinde áleýmettik baǵdarlamalardy áli de jeke múddesine paidalanatyn azamattar az emes. Mundai adamdar kez kelgen órkenietti eldegi siiaqty zańnyń jáne búkil qoǵamnyń aldynda jaýap berýi kerek. Osyndai jaǵdailar memleketten ala bersem degen kózqaras qalyptastyrdy», - dedi Prezident.
Sondai-aq, ol mundai jaǵymsyz tendentsiianyń kesirinen kómekke shynymen muqtaj adamdar áleýmettik qoldaý sharalarynan tys qalyp jatqanyn atady.
«Árine, bizdiń elimizdiń múmkindikteri zor. Biraq onyń da shegi bar. Eń bastysy, áleýmettik jeńildikke ie bolsam degen orynsyz piǵyl adamdy óz eńbegimen tabys tabý qabiletinen aiyrady. Mundai jalynsyz ómir salty urpaq tárbiesine qazirdiń ózinde keri áser ete bastady. Sondyqtan bizge túbegeili ózgeris kerek. Zań da, qoǵam da, adamdardyń sana-sezimi de ózgerýi tiis. Daiyndalyp jatqan Áleýmettik kodekste osyndai máselelerge barynsha nazar aýdarý kerek», - dedi Qasym-Jomart Toqaev.
