QR Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiia, Qazaqstandaǵy «BUU-Áielder» qurylymy jáne «Qoldanbaly ekonomikany zertteý ortalyǵy» birlesip áleýmettik kásipkerlik máseleleri jóninde kólemdi zertteý júrgizdi.
Zertteýdiń maqsaty – áleýmettik kásipkerlikti damytý úshin Qazaqstan zańnamalaryna ózgertýler ázirleý jáne olardy engizýge tujyrymdamalyq dálel jasaý, dep habarlaidy "Ult aqparat".
Zertteýge qatysqandar halyqaralyq tájiribeni taldap, álemdegi jáne eldegi áleýmettik kásipkerlik múmkindikterin, sondai-aq negizgi kedergilerdi zerdeledi. Saraptamalyq konsýltatsiialar men suqbattar ótkizip, zań jobasyn jáne onyń tujyrymdamasyn ázirledi.
Qazirgi ýaqytta Qazaqstanda qoǵamdaǵy áleýmettik máselelerdi, múmkindigi shekteýli azamattardyń, jastar men áielderdiń máselelerin, sondai-aq jumyssyzdyqty sheshýge baǵyttalǵan 300-ge jýyq (beiresmi derekte – 500) áleýmettik kásipker qyzmet etýde. Olardyń 57%-y qyzmet kórsetýmen ainalyssa, qalǵany taýar shyǵarý jáne olardy satýǵa den qoiǵan.
Zańnamada áleýmettik paidaly qyzmetpen ainalysatyn sýbektilerge memleket tarapynan qoldaý sharalary qarastyrylǵan. Atap aitqanda, salyqtyq jeńildikter, jumyspen qamtý salasyn yntalandyratyn sharalar, memlekettik satyp alýlarǵa qatysqanda basymdyq beretin quqyqtyń bolýy, granttar jáne mikrokredit alý quqyǵy. Alaida, atalǵan qoldaý sharalary shashyrańqy jáne jalpy alǵanda áleýmettik kásipkerlikti damytýǵa yqpal ete almaidy.
Zertteý avtorlary Ulybritaniia, Daniia, Italiia, Ońtústik Koreia, Kanada, Frantsiia jáne taǵy da basqa álemniń 16 eliniń zańnamalaryna taldaý jasady. Nátijesinde Qazaqstan «áleýmettik kásipkerlik» uǵymy naqty anyqtalǵan, oǵan qatysty ólshemsharttary rettelgen, halyqtyń áleýmettik jaǵynan osal toptarynyń tizimi anyqtaǵan elderdiń tájiribesine súienýi kerek degen qorytyndy jasap otyr. Mundai elderde memleket áleýmettik biznestiń qyzmetin qatań baqylaidy, al biznes bolsa, jeńildikter men artyqshylyqtardy keńinen qoldanady.
Zertteý avtorlary áleýmettik kásipkerliktiń quqyqtyq rejimin anyqtap, memlekettik qoldaý sharalarynyń naqty tizimin túzý kerektigin usynyp otyr. Aitalyq, áleýmettik baǵytta qyzmet etetin kásiporyndardy keibir salyq túrlerinen bosatý. Taýarlardy satý men qyzmetterdi usyný úshin marketpleis túzý. Onymen qosa, memlekettik múlikti usynýda jeńildik sharttaryn qarastyrý. Bizneske qoldaý kórsetýge baǵyttalǵan memlekettik baǵdarlamalar aiasynda áleýmettik kásipkerlik negizderin oqytý syndy usynystardy bildirdi.
Zertteý nátijesi múddeli memlekettik organdarǵa jáne uiymdarǵa zerdeleý jáne qoldaný úshin jiberilmek.
