Senat spikeri Máýlen Áshimbaevtyń tóraǵalyǵymen ótken Palata otyrysynda áleýmettik kásipkerlik jáne inkliýzivti bilim berý týraly zańdar qabyldandy, dep habarlaidy "Ult aqparat".
«Qazaqstan Respýblikasynyń keibir zańnamalyq aktilerine kásipkerlik, áleýmettik kásipkerlik jáne mindetti áleýmettik meditsinalyq saqtandyrý máseleleri boiynsha ózgerister men tolyqtyrýlar engizý týraly» zań jobasyna Parlament depýtattarynyń ózi bastamashy bolǵanyn aitý kerek.
Engiziletin ózgerister men tolyqtyrýlar boiynsha, áleýmettik kásipkerler halyqtyń áleýmettik osal toptary qataryndaǵy óz qyzmetkerlerin oqytyp, biliktiligin arttyrsa, salyq jeńildikterine ie bolmaq. Sondai-aq, memleket áleýmettik kásipkerlik nysandaryn infraqurylymmen qamtamasyz etýge jáne olarǵa qarjylyq, aqparattyq, konsýltatsiialyq, ádistemelik kómek kórsetýge mindetteledi.
«Memleket basshysy áleýmettik máselelerdi sheshýge, az qamtylǵan azamattar men erekshe qajettilikteri bar adamdarǵa qoldaý kórsetýge únemi kóńil bóledi. Bul turǵyda áleýmettik kásipkerlikti damytýdyń mańyzy zor. Bul ózgerister men tolyqtyrýlardy Senat depýtattary bastamashylyq etkenin jáne daiyndaǵanyn erekshe atap ótken jón. Otandyq zańnamada alǵash ret áleýmettik kásipkerlikke anyqtama berilip otyr», - dedi Máýlen Áshimbaev.
Senat tóraǵasy Memleket basshysynyń tapsyrmalaryn iske asyrý úshin osy Zań aiasynda ekonomikalyq ósimdi qalpyna keltirý jáne pandemiiadan zardap shekken kásipkerlerdi qoldaý boiynsha qosymsha sharalar kózdelgenin atap ótti.
«Zań óńdeý salasyndaǵy jańa kásiporyndarǵa qosylǵan qun salyǵyn 70 paiyzǵa tómendetýdi, óńdeýshi ónerkásiptiń jańa negizgi qorlaryna qaita investitsiialanǵan tabysty korporativtik tabys salyǵynan bosatýdy kózdeidi. Sondai-aq, jeke kásipkerlikti qoldaý úshin arnaiy mobildik qosymshany paidalaný arqyly arnaiy salyq rejimi engiziledi. Bul jeke kásipkerler qyzmetiniń jekelegen protsesterin jáne olardyń salyq organdarymen ózara is - qimylyn jeńildetedi», - dedi Senat tóraǵasy.
Sondai-aq, senatorlar, «Salyq jáne biýdjetke tólenetin basqa da mindetti tólemder týraly «Qazaqstan Respýblikasynyń kodeksine» (Salyq Kodeksi), «Salyq jáne biýdjetke tólenetin basqa da mindetti tólemder týraly «Qazaqstan Respýblikasynyń Kodeksin (Salyq kodeksi) qoldanysqa engizý týraly «Qazaqstan Respýblikasynyń Zańyna ózgerister men tolyqtyrýlar engizý týraly» ilespe zańdy qabyldady.
Otyrysta Parlament depýtattarynyń bastamasymen «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zań qaralyp, qabyldandy.
Zań erekshe bilim berilýine qajettiligi bar adamdardyń qoljetimdi bilimge quqyqtaryn kemsitýsiz iske asyrýǵa jáne olardy oqytýdyń barlyq deńgeilerinde inkliýzivti bilim berýmen qamtamasyz etýge baǵyttalǵan.
«Memleket basshysy óz Joldaýynda múmkindigi shekteýli azamattarǵa bilim alý úshin tiisti jaǵdai jasaýdy tapsyrdy. Sonyń aiasynda Parlament depýtattary osy zańdy arnaiy ázirledi. Bolashaqta bul memlekettiń bilim berý saiasatyn jetildiredi jáne múmkindigi shekteýli azamattardyń eshqandai kemsitýsiz bilim alýyna teń múmkindikter týǵyzady dep úmittenemiz», - dedi M. Áshimbaev.
