Foto: egemen.kz
Túrkistan oblysynyń Jumyspen qamtý jáne áleýmettik baǵdarlamalar bóliminiń janynan ashylǵan «Teń qoǵam» jáne «Ardagerler ortalyǵy» ortalyqtary qarttar men múgedek azamattarǵa qolaily jaǵdai jasaý maqsatynda ártúrli sharalardy júzege asyryp jatyr, – dep habarlaidy «Ult aqparat».
Teń qoǵam qurý – kez kelgen memlekettiń aldynda turǵan basty mindetterdiń biri. Ásirese erekshe qajettiligi bar jandardyń quqyǵy qorǵalyp, múmkindik jasaý úshin memleket tarapynan beriletin qoldaý men kómektiń yqpaly zor. Múmkindigi shekteýli azamattarǵa qatysty qoǵamdyq sananyń túbegeili jańarýyna yqpal etetin, qalyptasqan stereotipterdi jáne kemsitýlerdi tolyq joiatyn sharalardy qabyldap, oryndaý kerektigi týraly máseleler áli kúnge deiin ózektiligin joiǵan emes.
Túrkistan oblysynyń Jumyspen qamtý jáne áleýmettik baǵdarlamalar bóliminiń janynan ashylǵan «Teń qoǵam» jáne «Ardagerler ortalyǵy» ortalyqtary qarttar men múgedek azamattarǵa qolaily jaǵdai jasaý maqsatynda ártúrli sharalardy júzege asyrýda.
Ardagerler ortalyǵynda egde jastaǵy zeinetkerler men aǵa býynnyń ómir saltyn jaqsartyp, sportpen shuǵyldanyp, salaýatty ómir saltyn ustanýǵa, densaýlyǵyn nyǵaitý maqsatynda belsendi, mádeni, shyǵarmashylyq, sporttyq sharalar uiymdastyrylady. Ortalyqqa kelýshi Qusaiyn Saparov áleýmettik qyzmetkerler, áleýmettik jumys jónindegi mamandar men nevrologtyń, medbikeniń baqylaýynda bolatynyn atap ótti. Josparǵa sáikes kúndelikti massajben em qabyldaidy eken.
«Ortalyqtyń ashylǵanyna birneshe jyldyń júzi boldy. Ortalyqta kóńilińdi sergitip, biliard, tennis stoly, túrli jattyǵý quraldary, kitap oqý alańy, shahmat, toǵyzqumalaq, doiby oiyndarymen shuǵyldanýǵa múmkindik bar. Jan saýlyǵyna birden-bir em bolatyn tuzdy shahta da iske qosylǵan. Ózińmen qatarlas jandarmen birge áńgime-dúken quryp, merekelik keshter kórý úshin taptyrmas meken. Densaýlyǵymyzben qatar, janymyzdyń saýlyǵy úshin de taptyrmas oryn», – deidi qariia Qusaiyn Saparov.
«Teń qoǵam» ortalyǵy jartylai statsionarlyq jaǵdaidaǵy psihonevrologiialyq aýytqýlary bar, tirek qimyl apparaty buzylǵan múgedekter men 1,5 jastan 18 jasqa deiingi múgedektigi bar balalarǵa táýliktiń kúndizgi 4 saǵat ýaqytynda eki aýysym boiynsha qyzmet kórsetedi. Halyqtyń áleýmettik álsiz tobyna tiisti kómek kórsetý – qoǵam mindeti. Osy oraida ortalyq áleýmettik, psihologiialyq, quqyqtyq jáne jumysqa ornalastyrý boiynsha tórt baǵytta jumys isteidi.
Atalmysh ortalyq 18 jastan asqan múgedekterge, birinshi jáne ekinshi toptaǵy múgedekterge áleýmettik qyzmetter portaly arqyly jeke ońaltý baǵdarlamasyna sáikes estý apparattary, qolarba, jórgekter men tósenishter jáne taǵy basqa 55 tehnikalyq ońaltý quraldaryn alýǵa, tańdaýǵa kómek kórsetip, jumysqa ornalasýyna, qujattaryn rásimdeýge járdemdesedi jáne quqyqtyq, psihologiialyq kómekter kórsetip júr. Budan bólek, aýdandyq ortalyq aýrýhanamen birlese otyryp, ortalyq qyzmetine júgingen azamattarǵa túrli meditsinalyq kómek kórsetip júr. «Teń qoǵam» ortalyǵynyń mamany Jansulý Turǵanbai ortalyq jumysymen tanystyryp ótti.
«Múgedektigi bar tulǵalarǵa qai sala bolmasyn jan-jaqty qoldaý kórsetý jáne olardy qoǵamǵa integratsiialaý maqsatynda Almaty qalasynda 2022 jyldan bastap «Teń qoǵam» áleýmettik qoldaý ortalyǵy jumys isteidi. Ortalyq múgedektigi bar tulǵalarǵa jumysqa ornalasý jáne olardyń áleýetin iske asyrý úshin biliktilik alýǵa, bilim men daǵdylar alýǵa qajetti kómek kórsetedi. Sondai-aq múgedektigi bar tulǵalarǵa aqparattyq, konsýltatsiialyq, quqyqtyq, psihologiialyq qoldaý kórsetý jáne oqytýdy qamtamasyz etedi.
Múgedekterdi qoǵamǵa tiimdi beiimdeý maqsatynda kúndelikti ómirde jáne áleýmettik ómirde daǵdylandyrý ortalyqtyń basty maqsaty. Múgedektigi bar adamdar úshin kedergisiz orta qurý kez kelgen damyǵan qoǵamnyń birinshi kezektegi mindeti. Sondai-aq memlekettiń áleýmettik saiasatynyń ózekti baǵyty bolyp tabylady. Qoljetimdi orta – bul qozǵalysy shekteýli adamdardy ońaltý múmkindigi úshin sharalar kesheni.
Múgedektigi bar adamdarǵa óz quqyqtaryn iske asyrý boiynsha basqa azamattarmen teń múmkindikter berý maqsatynda Túrkistan oblysynda áleýmettik infraqurylymǵa qoljetimdilikti qamtamasyz etý boiynsha jumys júrgizilýde. Ádette, bul pasporttaý jáne beiimdeý kezeńnen turady», – deidi . «Teń qoǵam» ortalyǵynyń mamany Jansulý Turǵanbai.
Maman atap ótkendei, múmkindigi shekteýli azamattardy eńbekpen qamtyp, olardyń igi bastamalaryna qoldaý bildirý jáne densaýlyq, jan saýlyǵyna kóńil bólý úshin ortalyqtardyń alatyn orny erekshe.
