QR Bilim jáne ǵylym ministri Ashat Aimaǵambetov balalardy 6 jasynan mektepke qabyldaý tártibine qatysty túsinik berdi, dep habarlaidy "QazAqparat".
Budan buryn habarlanǵandai, Adam quqyqtary jónindegi ýákil Asqar Shákirov balalardy 6 jastan mektepke qabyldaýǵa qatysty ministrge úndeý joldaǵan edi.
«Ombýdsmenniń úndeý hatyna toqtalsaq, bul aqparatty jańalyqtardan oqydym. Meniń oiymsha, biz bul úndeýdi resmi túrde qarastyryp, belgilengen tártipte jaýabyn beremiz. Ózderińiz bilesizder, úsh jyl buryn bul norma qabyldanyp, zańǵa engizildi. Sondyqtan bul norma jańalyq emes. Sonymen qatar, aiyppul salynady degendi naqtylai almaimyn, iaǵni balalar alty jasynan mektepke barmaǵany úshin bizde aiyppul qarastyrylmaǵan», - dedi ministr Ortalyq kommýnikatsiialar qyzmetindegi baspasóz máslihatynda.
Onyń sózine qaraǵanda, 2014 jyly elimiz boiynsha birinshi synypqa 320 myń búldirshin baryp, onyń ishinde 60 paiyzy alty jasta bolǵan.
«Ótken jyly da 6 jasynan mektep tabaldyryǵyn attaǵan bala sanyna taldaý júrgizdik, olardyń 80 paiyzǵa jýyǵy alty jasynda oqýshy atandy. IýNESKO málimeti boiynsha álemniń 134 elinde alty jastan mektepke barady. Árine, balalardyń derbes erekshelikteri bar jáne osyny biz eskerýimiz kerek», - dedi A. Aimaǵambetov.
Ministr óz balasyn da mektepke alty jasynda bergenin jáne bul sheshimge esh ókinbeitinin atap ótti.
Sondai-aq, ol mektep formasyna qatysty túsinik berdi.
«Mektep formasy boiynsha Bilim jáne ǵylym ministrliginiń 26-shy buiryǵy kúshine engenine birneshe jyl boldy. Ondaǵy negizgi normalar aiasynda mektep formasy zaiyrly sipatqa ie. Sondyqtan mektep formasyna qatysty tiisti talaptar qarastyrylǵan. Atap aitqanda, jańa oqý jyly qarsańynda qandai da bir eleýli ózgeristerdi bizde eshkim de engizip jatqan joq», - dedi ministr Ortalyq kommýnikatsiialar qyzmetindegi baspasóz máslihatynda.
