Almatyda 2019 jyldyń 14-20 qyrkúiegi aralyǵynda qala kúni merekesi aiasynda II Halyqaralyq «Almaty Film Festival» kinofestivali ótedi, dep habarlaidy QazAqparat tilshisi.
Almaty Film Festival – Almaty qalasy ákimdiginiń bastamasymen Astana Film Fund uiymdastyrǵan jańa halyqaralyq kinofestival. Qazaqstan kinoóndirisin damytý, kinematografiia ónerine kópshilik qaýymnyń nazaryn aýdarý, halyqaralyq yntymaqtastyqty bekitý jáne elimizdiń mádeni astanasy Almaty qalasyn Ortalyq Aziia óńirindegi iri mádeni jáne saiahat ortalyǵy retinde, sonymen qatar álemdik kinoqaýymdastyǵyn Qazaqstan kinoóndirisiniń jańa múmkindikterimen hám artyqshylyqtarymen tanystyrý - festivaldiń basty maqsaty.
Ústimizdegi jyly festival «Mádenietter jaqyndastyǵy» degen uranmen 7 kún boiy negizgi úsh alańda ótedi.
Kinofestivaldiń qazylar alqasyna Altyn Palma Butaǵynyń iegeri, qazaqstandyq aktrisa Samal Esliamova, reseilik jetekshi kinoprodiýserlerdiń biri Aleksei Petrýhin jáne sheteldik kinematografister kiredi.
Festivaldiń arnaiy qonaqtary: «Horosho prodakshn» prodiýserlik ortalyǵynyń basshysy, reseilik tanymal prodiýser Natalia Ivanova; «Abramovich Qorynyń» direktory Anton Malyshev, Halyqaralyq Pýsan Kinofestivaliniń prezidenti Djei Djon, «European Children's Film Association» bas hatshysy Feliks Vanginderhiýsen, Resei Federatsiiasynyń úzdik kasting-direktory Elizaveta Shmakova, «The Hollywood Reporter» jýrnalisi Nik Holdvort, «Cineurope» - Eýropanyń jetekshi media-portalynyń jýrnalisi Vassilis Ekonomý, portýgaldyq prodiýser jáne Lokarno kinofestivaliniń júldegeri Paýlo Branko, frantsýz kinosynshysy, Kann HKF irikteýshisi Benjamen Illos jáne basqalar.
Festivaldiń qonaqtary arasynda ánshi, aktrisa jáne prodiýser Ásel Sádýaqasova, akter jáne prodiýser Farhat Ábdiraiymov, kino jáne TV akteri Sanjar Mádiev, aktrisa Ásel Saǵatova, aktrisa Qarlyǵash Muhamedjanova, stsenarist jáne rejisser Satybaldy Narymbetov, akter jáne rejisser Asanáli Áshimov, stsenarist jáne rejisser Dárejan Ómirbaev jáne basqa da kóptegen otandyq kino juldyzdary, qazaqstandyq kino jáne óner qairatkerleri bar.
Festival prezidenti, qazaqstandyq rejisser Aqan Sataev: «Qazaqstannyń kinematografiia salasy jaqsy ózgeristerdi bastan ótkerip jatyr. Kórermender arasynda otandyq kinoǵa degen qyzyǵýshylyq jyldan jylǵa artyp keledi. Almaty kinofestivali damyp, jas kinematorgrafisterge ideialaryn júzege asyrýǵa múmkindik berip otyr. Aýditoriia qyzyǵýshylyǵyn týdyrǵan jańa esimder týyp, olar Qazaqstannan tys jerlerde tanylyp keledi. Bul Qazaqstan mádenietiniń damýy úshin óte mańyzdy» dedi.
Almaty Film Festival negizgi baiqaýynyń taqyryby – «Mádenietter jaqyndastyǵy». Baiqaýǵa 2019 jyly eki nemese odan da kóp elderdiń birlesken óndirisinen shyqqan 12 kinotýyndy qatysady.
