Dinaralyq jáne mádenietaralyq dialogty damytý, shyǵys pen batys órkenietteri arasyndaǵy túsinistikti tereńdetý. Álemdik jáne dástúrli din liderleri sezi osy mindetterdi oryndaýǵa óz septigin tigizetin sharalar qatarynda. Sanaýly kúnderden keiin sezd hatshylyǵynyń kezekti otyrysy ótedi. Oǵan kimder qatysady, shara aiasynda qandai taqyryptar kóteriledi?
Álemdik jáne dástúrli din liderleri seziniń basty ortalyǵy – Beibitshilik jáne kelisim saraiy. Sarapshylardyń pikirinshe, osy alań arqyly Qazaq eli álemdik birlikke, tatýlyq pen dostyqqa úlesin qosyp jatyr. Dinbasshylarynyń alǵashqy kezdesýi 2003 jyly ótti.
"Shetelde eki myńynshy jyldardyń basynda dinaralyq qarym-qatynas órship ketti. Halyqtar bir-birine qarsy shyǵyp, sol kezde bizdiń sezdiń ómirge kelýi óte bir durys ýaqytynda boldy dep esepteimin" - deidi uiymdastyrý tobynyń ókili Rýslan Ahmet.
Sol qajettilikke qarai bastalǵan shara keiin dástúrge ainaldy. Sezd 20 jylda 7 ret uiymdastyryldy. Oǵan 58 elden delegat qatysty. Nátijesinde birlesken deklaratsiialar qabyldanyp, álem halqy men úkimetterge úndeýler jasaldy.
"Qazaqta sóz bar kózden ketken, kóńilden ketedi degen. Sondyqtan biz barynsha bir-birimizben kezdesip otyrý arqyly musylmannnyń birligin nyǵaitýǵa úlesin qosady. Odan ári qarai aitatyn bolsaq ártúrli dinderdiń bir ústel basyna jinalýy olardyń ymyraǵa, yntymaqqa kelýine sebep bolady" - deidi Bas múfti, Qazaqstan musylmandary dini basqarmasynyń tóraǵasy Naýryzbai qajy Taǵanuly.
Sezd ártúrli kún tártibimen, qatysýshylardyń erekshe formatymen, saiasi ikemdiligimen erekshelenedi. Qatysýshylar sanynyń ósýi jáne kún tártibinde talqylanatyn máselelerdiń damýymen forýmnyń baǵdarlamasy da aitarlyqtai keńeidi. Tek plenarlyq sessiialar ǵana emes, sonymen qatar birneshe sektsiialyq otyrystar túrinde ótkiziletin boldy.
Hatshylyq otyrysy qazannyń 11 kúni ótedi. Qazirdiń ózinde oǵan 20 elden 35 delegat qatysatyndyǵy rastalypty. Jiynda kelesi sezdiń taqyryptary qaralyp, aldaǵy 10 jyldyń damý tujyrymdamasy talqylanady.
«Habar» arnasy
