Álemdik jáne dástúrli dinder kóshbasshylarynyń VII sezi 2022 jyldyń qyrkúiek aiynda ótedi, dep habarlaidy QazAqparat.
Elordada ótken Álemdik jáne dástúrli dinder kóshbasshylary sezi hatshylyǵynyń HIH otyrysynyń qorytyndysynda VII sezd ótetin oryn men merzimi belgilendi. Atap aitqanda, Álemdik jáne dástúrli dinder liderleriniń VII sezi 2022 jylǵy 14-15 qyrkúiek kúnderi Nur-Sultan qalasynda ótedi. Atalǵan forýmda pandemiiadan keiingi kezeńde adamzattyń áleýmettik-rýhani damýyndaǵy álemdik jáne dástúrli dinder liderleriniń róli keńinen talqylanbaq.
Otyrys sońynda QR Parlamenti Senatynyń tóraǵasy – Álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev búgingi kezdesý túrli mádenietter men din ókilderiniń yntymaqtastyqta jáne beibitshilikte ómir súrýge degen ortaq umtylysyn kezekti ret pash etkenin atap ótti. Sondai-aq hatshylyq basshysy Álemdik jáne dástúrli dinder kóshbasshylary seziniń dástúrge ainalǵan osy umtylysy forýmnyń ári qarai da tabysty jumys isteýine negiz bolaryna senim bildirdi.
Sezd hatshylyǵynyń otyrysyna 20 elden kelgen álemdik dinder men konfessiialardyń jáne halyqaralyq uiymdardyń ókilderi qatysty. Din liderleri óz sózderinde Qazaqstan óz ishinde ǵana emes, halyqaralyq deńgeide de dinaralyq jáne konfessiiaaralyq dialog ornatýǵa basa mán berip, osy baǵytta mańyzdy jumys atqaryp kele jatqanyn airyqsha atap ótti.
