Bul týraly Qazaqstannyń eńbek sińirgen qairatkeri, dástúrli ánshi Erlan Rysqali aitty, dep habarlaidy Baq.kz portaly.
"Keshegi ótken bas partiianyń kezekten tys jiynynda Prezidentimiz Qasym-Jomart Toqaev kókeide júrgen dúnielerdi aitty. Qazir qarapaiym halyqtyń arasynda partiianyń ataýynyń ózgertilýi keń talqyǵa salynyp, jelide de aitylyp jatyr. «Amanat» degen sóz qazaq úshin óte qasietti uǵym. Sondyqtan óz basym bul sheshimdi durys dep qabyldaimyn. Ári ózderińiz bilesizder, osy 30 jyldyń ishinde eski júie, qalyptasyp qalǵan dúnieler bar. Jasandy biýrokratiia, qaǵazbastylyq syndy nárseler partiianyń ishinde ataqqumarlyqqa, imidjdi kóterý úshin ǵana jasalynǵanyn jurt biledi", - dep aǵynan jaryldy ánshi.
Sondai-aq ol joǵaryda atalǵandardyń Prezidentimiz jiyn barysynda atap aityp, partiianyń jańa Qazaqstandy qurý úshin bar kúsh-jigerin salatynyna toqtaldy.
"Tiisti tapsyrmalar berdi. Popýlizm bolmaýy kerek dedi. Bilim sapasyna kóńil bólý, búgingi álemdegi bolyp jatqan oqiǵalarǵa, ózgeristerge, damýlarǵa daiyn dúnielerdiń bárin qamtyp, oilai alatyn saiasi jetik menedjerlerdi daiyndaý kerektigin alǵa tartty. Jalpy áleýmettik jelide qoǵamdaǵy ózekti jaittar qyzý talqylanyp jatady. Sol máselelerdi Parlamentte, Senatta qaraý týraly oiymen kelisemin. Sol ózekti problemalardy zań shyǵaratyn organdar qarap, talqylasa, kez kelgen dúnieni kelisimmen sheshýge sebep bolar edi. Ashyq Úkimettiń bolýy el úshin óte tiimdi. Ataýdyń ózgerýiniń ózi bir qadam bolsa da halyqtyń kókeiindegi kúmándi seiiltetin jaqsy bastama dep esepteimin", - deidi Erlan Rysqali.
Sonymen qatar endigi kezekte Qazaqstan halqyna jumylǵan judyryqtai birigip, kez kelgen dúnieni sanamyzdan saralap baryp jariialaýymyz qajet dep otyr.
"Prezidentimizdi qoldaýymyz qajet. Sebebi «qańtar oqiǵasynda» egemendigimiz synǵa tústi. Báigede azattyǵymyz turdy. Biraq Alla qoldap, eldiń peiili men birliginiń, Memleket basshysynyń kóregendiginiń arqasynda saqtap qaldyq. Babalarymyz aitqandai, «Erim» deitin el bar ekenin bilse, «elim» deitin er» týady. Qazir ulttyq qundylyqtarymyz alǵa shyǵýda. Bul ulttyq ideologiianyń qalyptasyp kele jatqandyǵy. Bul da jańa Qazaqstannyń biikten kórinýine sebeptigin tigizedi. Biz álemdi moiyndatý úshin babalardyń jolynan, dástúrinen, tilinen ajyramaýymyz qajet. Sonda ǵana óziniń sara joly qalyptasqan myqty memleket bola alamyz", - dedi ol.
