Dúniejúzilik densaýlyq saqtaý uiymy ótken táýlikte koronavirýs juqtyrý jaǵdailarynyń eń kóp sanyn tirkedi, dep habarlaidy "Ult aqparat" uiymnyń resmi saityna silteme jasap.
Bir táýlikte indetke shaldyǵýshylar sany 308 myńǵa artty. Bul – pandemiia kezeńindegi eń kóp táýliktik ósim kórsetkishi. Álemde aýrý juqtyrý jaǵdailarynyń jalpy sany 28,6 millionǵa jetti. Koronavirýs infektsiiasynan kóz jumǵandar sany 5,6 myńǵa artyp, 917,417-ge jetti.
AQSh indetke shaldyqqandar jáne virýstan qaitys bolǵandar sany boiynsha álemde kósh bastap tur. Munda 6,3 million adam koronavirýs juqtyrsa, 191 myńnan astam adam kóz jumǵan.
Aýrý juqtyrǵandar sany boiynsha ekinshi orynda turǵan Úndistanda 4,6 millionnan astam adam indetke shaldyqqan. Munda koronavirýstan 78,5 myń adam qaitys bolǵan.
Braziliia rastalǵan jaǵdailar sany boiynsha úshinshi orynda. Munda aýrý juqtyrýdyń 4,2 million jaǵdaiy tirkelgen. Braziliiada 130 myńnan astam adam koronavirýstan kóz jumǵan.
