QR AShM Agrarlyq azyq-túlik naryqtary jáne aýyl sharýashylyǵy ónimin qaita óńdeý departamentiniń direktory Nazgúl Hatepova álemde bidai men unnyń qymbattaǵanyn, onyń Qazaqstan naryǵyna esh áser etpeitinin túsindirdi, dep habarlaidy QazAqparat.
«Sońǵy kezderi BAQ-ta unnyń nemese nannyń baǵasynyń kóteriletini týraly kóp aqparat taralýda. Ishki naryqta bidaiǵa nemese unǵa degen tapshylyq joq. Árine, álemdik naryqta Resei tarapynan salynǵan shekteýge bailanysty bidai men unǵa suranys artqany belgili. Osy sebepti álemdik naryqta bidai baǵasy birneshe esege óskeni baiqalady. Oǵan qaramastan, biz ishki naryqty turaqtandyrý maqsatynda turaqtandyrý qorlarynda qajetti kólemde kez kelgen óńirdiń óziniń fiziologiialyq tutyný normalaryna sáikes, sol halyqty qajetti kólemde qamtamasyz etý úshin kepildi túrde turaqtandyrý qorlarynda qajetti kólemdegi un satyp alamyz», - dedi spiker Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, Qazaqstanda 120 myń tonnaǵa jýyq un bar. Sonyń 30 myńǵa jýyǵy turaqtandyrý qorlarynda saqtaýly.
«Turaqtandyrý qorlarynyń negizgi mindetteriniń biri – baǵany turaqtandyrý. Iaǵni naryqta, Qazaqstanyń ishki naryǵy bolsyn, álemdik naryq bolsyn, bidai nemese un baǵasy qymbattaǵanda atalǵan turaqtandyrý qorlarynda saqtaýly turǵan un ishki naryqta arzandatylǵan baǵamen satylady. Odan bólek, Azyq-túlik kelisimshart korporatsiiasynyń rezervinde 800 myń tonnaǵa jýyq astyq saqtalǵan. Onyń 500 myń tonnasy rezervtik qor bolyp sanalady. Atalǵan qordyń da negizgi maqsaty - ishki naryqty turaqtandyrý nemese qandai da bir tapshylyq týyndaǵan kezde kepildi túrde ishki naryqty bidaimen qamtamasyz etý. Sondyqtan bidai nemese un baǵasynyń álemdik naryqta ósýi ishki naryqta tikelei unnyń nemese nannyń baǵasynyń kóterilýine áser etedi degen pikir – qate. Elimizde ishki naryqta memleket tarapynan qoldanylyp otyrǵan baǵany turaqtandyrýǵa arnalǵan arnaiy baǵdarlamalar bar. Sonyń aiasynda áleýmettik nanǵa jáne unǵa degen baǵa árdaiym turaqty bolady. Ishki naryqta bidai qory jetkilikti. Ishki naryqta unnyń óndirisi úzdiksiz júrgiziledi jáne kún saiyn qajetti un kólemimen tolyqtyrylyp otyrady», - dedi Nazgúl Hatepova.
Buǵan deiin Astyq óńdeýshiler odaǵy elimizde bir jarym aptaǵa ǵana jeterlik bidai qory qalǵanyn málimdegen edi. Astyq ósirýshiler men óńdeýshiler bidaidy bólise almai daý týǵany, bidai taýsylsa, barlyq diirmender jumysyn toqtatýǵa májbúr ekeni aitylǵan edi.
Óz kezeginde Aidarbek Saparov elde eshqandai astyq tapshylyǵy joq ekenin málimdedi. 1 sáýirdegi jaǵdai boiynsha respýblikada 6,4 mln tonna astyq bolǵan.
7 sáýirdegi jaǵdai boiynsha eldegi un qory 118 myń tonnaǵa jetedi, onyń ishinde: turaqtandyrý qorlarynda - 10,4 myń tonna, «ainalym shemasy» aiasynda – 22 myń tonna, óndirýshilerde – 48,6 myń tonna, qoimalarda – shamamen 20 myń tonna jáne saýda obektilerinde – 18 myń tonna bar. Atalǵan kólem ishki qajettilikti qamtamasyz etýge tolyq jetkilikti.
