Birikken ulttar uiymy esirtki ainalymy boiynsha 2019 jylǵy ahýal jóninde búkilálemdik baiandamasyn jariialady. Baiandama mátinin QR Ishki ister ministrliginiń Esirtki biznesine qarsy kúres departamenti taratty, dep habarlaidy "Ult aqparat".
Qujatta esirtki qoldanýshylarynyń sany boljamdy mólsherden 53 paiyzǵa asyp, 53 mln adamǵa jetkeni aitylǵan.
«Sintetikalyq esirtki ainalymy artqan saiyn fentanil men onyń balamalaryn tutynyp kóz jumǵan adamdar sany kóbeiýde. 2017 jyly esirtkiden 585 myń adam ajal qushty. Osy ólimderdiń úshten ekisin opiým týdyrǵan. Álemde eń kóp taralǵan esirtki – qarasoradan alynatyn kannabis. Al eń qaýipti esirtki – geroin men opiým. Álemdegi geroin ainalymynyń eń iri baǵyty burynǵydai Balqan arqyly ótýde. Iaǵni, esirtki Aýǵanstannan Iranǵa, Túrkiiaǵa, Balqan elderine kontrabandalyq jolmen túsedi», - delingen baiandamada.
Sondai-aq, geroin Aýǵanstannan Pákistan arqyly Ońtústik Aziiaǵa, Afrikaǵa jáne Ortalyq Aziia arqyly Resei naryǵyna shyǵatyny aitylǵan. Degenmen, halyqaralyq sarapshylardyń málimetinshe, bul baǵyttardyń mańyzdylyǵy bara-bara tómendep keledi. Muny olar sintetikalyq esirtkiniń keńinen taralýymen túsindirip otyr.
Baiandamada Ortalyq Aziia elderi bul baǵytta BUU-nyń Esirtki jáne qylmys jónindegi basqarmasynyń qoldaýymen áreket etip jatqany airyqsha atalǵan. Almatyda ornalasqan Ortalyq Aziia óńirlik aqparattyq úilestirý ortalyǵy siiaqty platformalar arqyly óńirde yntymaqty kúres júrip jatqany da qujatqa arqaý bolǵan.
Atalmysh baiandamanyń tolyq mátinimen QR Ishki ister ministrliginiń resmi portalynan tanysýǵa bolady.
BUU Bas hatshysy Antoniý Gýterrishtiń úndeýinde memleketter nashaqorlyqtyń aldyn alýy, esirtkige qumarlardy olardyń quqyqtaryn saqtai otyryp, ońaltýdan ótkizýi qajettigin atap ótti. Bul rette, otbasy, mektep pen qoǵam mańyzdy rol oinaidy. BUU Bas hatshysy sondai-aq, el úkimetterin jastarmen jumys istep, olardyń salaýatty ómir saltyn ustanýyna qolǵabys etýge shaqyrdy.
