Shynaiy táýelsizdik pen egemendik ulttyń básekege qabiletti mediakontent jasai alýymen ólshenedi. Bul pikirdi Eýraziialyq Media forýmnyń uiymdastyrý komitetiniń tóraiymy Dariǵa Nazarbaeva XVII forýmnyń ashylýynda aitty, dep habarlaidy QazAqparat.
«Táýelsizdiktiń 30 jyldyǵy BAQ-tyń ekonomika men qoǵamdyq ómirdegi rólin baǵalaý úshin jaqsy sebep bolyp otyr. Jahandyq aqparattyq orta memlekettik shekaralarmen sáikese qoimaidy, ulttyq jáne mádeni egemendikke aitarlyqtai qaýip tóndirip keledi. Bizdiń tarihymyz, mádenietimiz, tilimiz – myzǵymas qundylyqtar. Búginde olardyń qorǵalýy men damýy aýditoriia úshin, kórermenniń nazary men senimi úshin jahandyq básekelestikke aýysty. Men qazirgi álemde shynaiy táýelsizdik pen egemendik – ulttyń básekege qabiletti mediakontent jasai alýyn bildiredi dep esepteimin», - dedi Dariǵa Nazarbaeva XVII Eýraziialyq media forýmnyń ashylýynda.
D. Nazarbaeva bul máseleniń Qazaqstan úshin de syn-qater bolyp otyrǵanyn aitty.
«Ótken eki jylda adamzat buryn-sońdy bolmaǵan synaqtarǵa tap boldy. Koronavirýs pandemiiasy jáne onymen bailanysty ekonomikalyq-áleýmettik kataklizmder álemdi tanymastai ózgertip jiberdi, barlyq zamanaýi qoǵamdardyń, barlyq áleýmettik qorǵaý jáne densaýlyq saqtaý júieleriniń tereń problemalary aiqyn kórindi. Halyqaralyq deńgeide memleketaralyq qatynastardyń tutas júiesiniń beriktigi synalyp keledi, negizgi syn-qater faktory – senimniń joǵalýy boldy», - dep atap ótti spiker.
Dariǵa Nazarbaevanyń aitýynsha, memleketaralyq, halyqaralyq dialog pen senim tetikteriniń álsireý protsesi buryn bastalǵan, biraq pandemiia bul protsesti jedeldetip, oǵan túbegeili jańa ólshem berdi.
«Bul - árine, óte alańdatarlyq úrdis. Kez kelgen senim áńgimeden, ózara syilastyqtan bastalady. Qazir álem dialogtyń jańa formattary men jańa formalaryn izdei bastaǵanyn kórip otyrmyz. Biz Eýraziialyq media forýmnyń bul protseske óz úlesin qosatynyna qýanyshtymyz. Birneshe jyl buryn Elbasy Nursultan Nazarbaev: «Taptaýryndarǵa qaramastan Batys pen Shyǵys Qazaqstan jerinde, álemdik jáne dástúrli dinder kóshbasshylarynyń sezderinde jáne basqa da alańdarda keń dialog ornatý úshin turaqty túrde birigedi» degen edi. Bizde aitylatyn, talqylanatyn nárse kóp, aiyrmashylyqtardy emes, konstrýktivti ózara árekettesý úshin onyń aldyn alý joldaryn izdeý kerek. Bizdiń forýmnyń urany «2021: álem jańa qundylyqtar izdeidi» dep atalýy tegin emes. Eýraziialyq media forým búkil álemniń qoǵamdyq pikir kóshbasshylaryna táýelsiz Qazaqstandy kórýge jáne bilýge, bizdiń elimizdi súiýge múmkindik berdi», - dedi Dariǵa Nazarbaeva.
Aita keteiik, búgin Nur-Sultanda XVII Eýraziia media forýmynyń jumysy resmi túrde ashyldy. Forým 17 qyrkúiekke deiin jalǵasady.
