Elordadaǵy «Qazaqstan» ortalyq kontsert zalynda «Mereili otbasy» ulttyq konkýrsynyń qorytyndy kontserti ótip jatyr, dep habarlaidy QazAqparat tilshisi.
Qyrkúiektiń ekinshi jeksenbisi Qazaqstanda Otbasy kúni retinde toilanady. Osy aitýly dataǵa orai, elordada «Mereili otbasy» konkýrsynyń jeńimpazdary marapattaldy. Eldegi 14 oblys pen 3 respýblikalyq mańyzdaǵy qalanyń namysyn qorǵap kelgen úzdik otbasylar astana tórinde qoshemetke ie boldy.
Marapattaý rásimine qatysqan QR Premer-Ministriniń orynbasary Berdibek Saparbaev jeńimpaz januialarǵa Prezident Qasym-Jomart Toqaevtyń quttyqtaý hatyn oqyp berdi.
«Halqymyzdyń ulttyq jáne otbasylyq dástúrlerge beriktigi qoǵamdaǵy rýhani qundylyqtardyń saqtalýyna yqpal etedi. Bul memlekettik is-shara – Qazaqstannyń áleýmettik saiasatynyń mańyzdy bóligi. Elimizde jyl saiyn halyqtyń ómir súrý jaǵdaiyn, turmys sapasyn jaqsartýǵa baǵyttalǵan mańyzdy sheshimder qabyldanýda. Elbasy bastamasymen merekeler kúntizbesine Otbasy kúni meiramy engizildi. Yrys-berekesi men yntymaǵy jarasqan máýeli áýletterdi nasihattaityn «Mereili otbasy» ulttyq baiqaýyn ótkizý dástúrge ainaldy. Bul sharalar san ǵasyrlar boiy qalyptasqan ulttyq-ádet ǵuryptardyń, salt-dástúrlerdiń jańǵyrýyna, otbasy institýtynyń nyǵaiýyna, urpaq tárbiesine jańasha mán berip, ónegeli áýletterdiń órisin nyǵaitýǵa yqpal etedi. Bul konkýrsqa qatysýshylardyń barlyǵyn jeńimpazdar dep aitýǵa bolady. Óitkeni, osy konkýrsqa qatysqan árbir otbasy mereili», - delingen Memleket basshysynyń quttyqtaýynda.
Jyldaǵydai bul joly da elimizdiń eń «Mereili otbasyn» anyqtaýǵa barsha qazaqstandyqtar atsalysqan bolatyn. SMS-pen jáne internet arqyly daýys berý nátijesinde atyraýlyq Tilekqabylovtar áýletine «Mereili otbasy» ulttyq konkýrsynyń laýreaty» ataǵy berildi. Jeńimpaz januiaǵa otandyq «SaryarqaAvtoProm» JShS shyǵarǵan shaǵyn avtobýstyń kilti tabystaldy.
Áýlettiń tiregi bolǵan eńbek ardageri, bilim salasynyń qurmetti qyzmetkeri, Aǵartý isiniń úzdigi, Inder aýdanynyń qurmetti azmaty Tólesh Tilekqabyluly qazir ómirde joq. Áýlet anasy Aimedet Qabdeshqyzynyń jasy 82-de. Kitaphanashy bolyp jumys istegen ájei «Altyn alqa», «Eńbek eri» medalderiniń iegeri. Qazir ol 8 baladan 28 nemere, 16 shóbere súiip otyr. Nemereleriniń beseýi mektepti «Altyn belgimen» aiaqtasa, úsh nemeresi «Qyzyl diplom» iegeri atanǵan. Abylai Tólesh atty nemeresi - pankrationnan álem chempiony, jaýyngerlik sambodan álem kýboginiń eki dúrkin kúmis júldegeri.
Eske salsaq, «Mereili otbasy» ulttyq baiqaýyna biyl 3204 otbasy qatysqan bolatyn. Alty jylda atalmysh konkýrsta 15 197 otbasy baq synapty. Onyń 62 paiyzy - aýyl januialary, 3 paiyzy - kópbalaly otbasy, 18 paiyzy - jas oshaqtar, 17 paiyzyn eńbek dinastiialary quraǵan.
