Jyldam shahmattan (blits) álem chempionatynyń jeńimpazy Bibisara Asaýbaeva elordaǵa keldi. Grossmeister Nur-Sultan qalasynyń kishkentai shahmatshylarymen bir partiia shahmat oinap, sheberlik saǵatyn kórsetti, dep habarlaidy QazAqparat.
Álem shahmaty tarihyndaǵy eń jas chempion atanǵan sportshyny keshe áýejaidan QR MSP Sport komiteti, Qazaqstan shahmat federatsiiasy ókilderi, jankúierleri, jas shahmatshylar kútip alǵan bolatyn. Bibisara 25-30 jeltoqsan aralyǵynda Polshadaǵy chempionatqa qatysyp, el abyroiyn asqaqtatty.
«Varshava qalasyndaǵy týrnir 5 kúnge jalǵasty. Rapidten ekinshi oryn, blitsten birinshi orynǵa qol jetkizdim. Bul jarysqa óte tyńǵylyqty daiyndaldym. Buǵan deiingi eń joǵarǵy jetistigim 13 jasymda rapidten 10-oryn alǵanym edi. Jeńis tuǵyrynda turyp, Qazaqstannyń gimni oinaǵanda erekshe maqtanysh seziminde boldym. Qazaqstandyq jankúierlerdiń qoldap jatqanyna óte qýanyshtymyn», - dep alǵysyn bildirdi Asaýbaeva.
Qazaqstan shahmat federatsiiasy ókilderi otandyq jas shahmatshylardy Bibisaranyń jeńisi jigerlendiretinin aityp otyr. Onyń ústine osy jas býynnyń arasynan myqty sportshylardyń joǵary nátije kórsetý tendentsiiasy Qazaqstanda erekshe baiqalady.
«Bibisaranyń jeńisin álemdik rekord deýge bolady. Óitkeni ol - ázirge álemniń eń jas chempiony. Eresekter arasynda endi Qazaqstanda da chempion bar. Bul jas býyn úshin alǵa umtylýǵa sebep bolady. Bibisaranyń keleshekte budan da úzdik nátijeler kórsetýine áleýeti bar. Jalpy, 2021 jyl Qazaqstannyń shahmat sporty úshin óte sátti aiaqtaldy. 9 jyl boiy grossmeister shyqpap edi, mine, biyl eki sportshymyz grossmeister atandy. Sochidaǵy álem kýbogynda jaqsy jetistikterge jettik, Olimpiada oiyndarynda qurama 8-oryn aldy. Qazaqstanda 10 myń bala shahmatpen ainalysady, úmitimiz sol jastarda», - dedi Rýslan Ysqaqov.
Mysaly, 10 jasqa deiingi balalar arasynda Qazaqstan chempiony bolǵan Aiarý Altynbek Bibisaranyń jetistigin qaitalaǵysy keledi.
«Men buǵan deiin Astananyń 3 dúrkin jeńimpazy boldym. Aziia chempionatynda 2-oryn aldym. Búgin Bibisarany kútip alyp, tanystym. Onymen kezdeskenime qatty qýanyshtymyn. Men de Bibisary siiaqty álem chempiony atanǵym keledi», - deidi kishkentai shahmatshy.
Rapid jáne blitsten álem chempionaty (FIDE World Rapid and Blitz ) - sport jankúierleriniń kópshiligi úshin shahmat kúntizbesindegi eń súiikti jáne asyǵa kútetin oqiǵalardyń biri. 2021 jyly aýqymdy sharaǵa 50 elden 200-ge jýyq sportshy – álem chempiondary men vitse-chempiondary, qazirgi el chempiondary jáne álemniń reitingi joǵary shahmatshylary qatysty.
Buǵan deiin Asaýbaeva klassikalyq shahmattan 8, 10, 12 jáne 14 jasqa deiingi qyzdar arasynda álem chempiony, 7, 9 jasqa deiingi mektep oqýshylary arasynda álem chempiony atanǵan.
