Bokstan álem chempionatynyń kúmis júldegeri Serik Temirjanovqa páter kilti tabystaldy, dep habarlaidy QazAqparat.
Álemdik birinshilikte Qazaqstannyń dańqyn asyrǵan sportshyny Pavlodar oblysynyń ákimi Ábilqaiyr Sqaqov quttyqtady.
Boksshyǵa arnaǵan sózinde aimaq basshysy jerlesimizdiń Serbiiada ótken álem chempionatyndaǵy barlyq jekpe-jegin kórgenin atap ótti.
- Seniń «kúmisiń» ulttyq quramanyń qorjynyna qomaqty úles qosty, - dedi Ábilqaiyr Sqaqov. - Aita ketý kerek, bul pavlodarlyqtardyń bokstan erler arasyndaǵy álem chempionattarynda jeńip alǵan alǵashqy medali. Osy marapattyń arqasynda jerlesimiz pavlodarlyqtar arasynda birinshi bolyp Qazaqstan Respýblikasynyń bokstan eńbek sińirgen sport sheberi atanǵany kóńilimizdi odan saiyn kóterdi. Dál osy joǵary jetistikpen shyn júrekten quttyqtaimyn. Jattyqtyrýshylaryńmen birge jańa belesterdi baǵyndyryp, sonyń ishinde jazǵy Olimpiadada jeńiske jetedi dep senemin.
Halyqaralyq arenada úzdik óner kórsetkeni úshin marapat retinde sportshyǵa páter kiltteri tabystaldy.
Boksshy barlyq jerlesterine qoldaý kórsetkeni úshin alǵys aityp, aldaǵy ýaqytta iri jarystardyń «altynyn» alý úshin bar kúshin jumsaýǵa ýáde berdi.
- Olimpiadadan keiin biz kóp eńbek ettik jáne álemdik týrnirde jaqsy óner kórsettik dep oilaimyn, - dedi Serik Temirjanov. - Men munymen toqtap qalmaimyn. Bolashaqta kúmis medaldi altynǵa ainaldyrǵym keledi. Bizdi qoldaǵan barlyq jandarǵa alǵys aitamyn.
Kezdesý barysynda sportshynyń tálimgeri Azamat Maqajanov ta sóz sóiledi. Ol jattyqtyrýshy rólinde ózi ringte óner kórsetkennen áldeqaida kóp tájiribe alǵanyn moiyndady.
- Biz der kezinde úlgerdik, óitkeni bizdiń sportshynyń álem chempionatyna qatysý-qatyspaýy ekitalai edi, - dep moiyndady Azamat Maqajanov. - Biraq Serik ózine tán sabyrlylyqpen judyryqtasyp, ulttyq quramadaǵy sparringter kezinde jaqsy nátije kórsetti. Sol kezde Baqtiiar Artaev (bokstan Qazaqstannyń memlekettik jattyqtyrýshysy - esk.) «Týrnirge daiyndalyńdar, biraq sizderden tek jeńis kútemiz» - dedi. Biz bul mindetti oryndadyq.
Aita keteiik, Belgradta ótken bokstan álem chempionatynda Serik Temirjanov 57 kelige deiingi salmaq dárejesinde elimizdiń namysyn qorǵady.
Finalǵa jeter jolda ol Mońǵoliia, Japoniia, Úndistan, Resei jáne Kýbadan kelgen ataqty boksshylardy utty.
Finalda pavlodarlyq sportshy amerikalyq Djamal Harvige ese jiberip aldy.
