Foto: Erika Rozena/FIDE
25 jastaǵy Sarasadat Hademalshareh biyl 25-30 jeltoqsanda Almatyda ótken FIDE blits-shahmattan álem chempionatyna qatysqannan keiin Ispaniiaǵa kóshýge májbúr.
Ol 2012 jyldan beri álemdegi eń perspektivaly irandyq shahmatshylardyń biri, dep habarlaidy QazAqparat tilshisi EL PAÍS-ge silteme jasap.
Sportshy hidjab dep atalatyn dástúrli oramalsyz oinaǵan. Musylman oramalynyń bolmaýy zańbuzýshylyq jáne ony Iran rejimi narazylyqty qoldaý dep esepteidi.
Sportshy Irandaǵy otbasynyń qaýipsizdigine alańdaýly, sebebi birneshe sýretke hidjabsyz túsken. EL PAÍS derekkózine sáikes, shahmatshy otbasynyń Ispaniiada páteri bar.
Sarasadat irandyq shahmatshy Alireza Firýziiany (álemde 4-shi orynda, Frantsiiaǵa kóshken, izraildik qarsylasymen oinaýǵa tyiym salynǵandyqtan jeńilip qaldy) qoldap, videorolik joldady. Ol Iran úkimetiniń izraildiktermen oinaýǵa tyiym salý týraly zańnyń kúshin joiý keregin málimdegen bolatyn. Osydan soń el úkimeti shahmatshyǵa qysym kórsete bastaǵan.
Úsh jyl buryn Ispaniiadaǵy Sunway Sitges shahmat festivalinde Irannyń eki úzdik oiynshysy Parham Magsýdlý men Amin Tabatabai 17 jastaǵy Ido Gorshteinnen jeńilip qalǵan edi. Iran úkimeti ashýlanyp, sportshylaryn tergeýge aldy. Olar qarsylasynyń izraildik ekenin bilmegenin aitqan.
Iranda shahmat oinaýǵa 1989 jyly ruqsat etildi. Sodan beri shahmat damyp, irandyq sportshylar júldeli oryndar alyp júr. Qazirgi tańda Iran Aziia óńirindegi uly shahmat derjavalarynyń biri bolyp sanalady.
